Tih vơ̆ lơ̆m minh unh hnam jang mir ƀa, tơring đei lơ kon pơlei Khmer hơrih jang xa, noh Huỳnh Thị Kẩm Huyên đơ̆ng oei 'lơ̆p hlôi băt hơdah tơdrong hrat kơ mĕ ƀă adoi nhen kon pơlei tơ̆ tơring po. Kơyuơ đơ̆ng tơdrong noh mă pơtrŭt duch kiơ̆ tơdrong hŏk y hŏk, hăm tơdrong 'meh hơ-'nhăk tơdrong hŏk đei păng tơpang ti po vă hơmet jĭ ăn bơngai hin dơnuh gơh tơnăp hloh. Ƀak si Kẩm Huyên tơroi, đơ̆ng oei 'lơ̆p duch hlôi đang măt ƀôh lơ bơngai ƀơm jĭ jăn mă ưh đei hơmet ming tơnăp.

Đei bơngai jĭ kơlih ưh đei dŏng hơmet tơtom mă jing jĭ ăl hloh noh duch sơkơ̆t dơh po ah tih vơ̆ athei pơm jang thoi yơ vă tơgŭm đe sư gơh đei vei lăng tơnăp hloh gah hơmet jĭ jăn, lơ̆m kơplah noh mĕ ƀă adoi lăp hăm tơdrong tơchơ̆t kơ kon:  “Mĕ ƀă noh ưh đei pơđep hăm tơdrong hŏk pơhrăm dah mă rơih hŏk dôm tơdrong jang kơ kon hơ-ioh. Ah oei 'lơ̆p inh adoi ƀơm jĭ jăn, păng rim 'măng jĭ noh ƀôh mĕ ƀă hrat dêh, noh inh tơchĕng thoi yơ ning mônh kơnh pơm yă kiơ vă gơh tơgŭm bơngai nai đei hơmet jĭ jăn tơnăp hloh, mĕ ƀă jĭ pơlŏ noh đei vei lăng 'lơ̆ng hloh. Noh inh rơih hŏk gah tơdrong jang pơgang hơmet jĭ jăn”

Sơnăm 2015, đơ̆ng rŏng hŏk đang đei bằng Ƀak si đa khua, Huỳnh Thị Kẩm Huyên đei asong pơm jang tơ̆ Khua kâ̆p kư̆u, Hnam pơgang tơm apŭng Châu Thành (dang ei noh Anih jang Pơgang Hơmet jĭ jăn apŭng Châu Thành). 10 sơnăm kơ ou, ƀak si Kẩm Huyên ưh kơ băt hơdah kơdih po hlôi vei lăng jơhngơ̆m jăn, hơmet jĭ ăn dôm yơ bơngai. Lơ bơngai ƀơm sar bar, ƀơm tơdrong jĭ ou to đei duch păng khul jang dŏng hơmet tơtom hơdrol kơ chơ 'nhăk truh hnam pơgang tơm trŏ ƀlep. Ưh hơdrô̆ tơnăp hăm tơdrong kâ̆p kư̆u bơngai jĭ, ƀak si Huyên sơ̆n jơhngơ̆m păng vei lăng tơnăp hăm bơngai jĭ 'lŏ sơnăm. Lơ̆m noh đei lơ yă ƀok kră pơngơ̆t bơnôh hăm ƀak si. Mă lei hăm tơdrong dim dăp đon dăp bơnôh, Huyên hlôi pơjing đei đon lui păng 'mêm băt.

Ƀok Nguyễn Văn Liêu tơ̆ xah Hưng Mỹ, apŭng Châu Thành – bơngai jĭ kơting kơdŭ, đơ̆ng lơ sơnăm kơ âu hơnơ̆ng mơ̆t lĕch hơmet jĭ tơ̆ hnam pơgang ăn tơbăt: 'Nâu jĭ hnam pơgang apŭng mă lei tơƀưh tơjê̆ hăm dêh char, bơngai truh kâ̆p kư̆u, khăm hơmet jĭ mă lơ noh bơngai 'lŏ kră păng unh hnam hin dơnuh, jĭ dôm bơngai ưh đei lơ jên hu su kăk mă lei ƀak si dăp đon dăp bơnôh, tơnăp:  “Lăng atŭm ƀak si tơ̆ ou tơnăp, ba jĭ yă kiơ, krao ƀak si noh đe sư truh hloi. Oei ƀak si Huyên thoi ăi mơ̆n, dăp đon dăp bơnôh, ba jĭ noh krao ƀak si truh hloi, tơnăp tơpă”.

Hơdơ̆r nơ̆r Ƀok Hô pơtho đe thâi pơgang: “Thâi pơgang thoi lĕ mĕ dim”, ƀak si Huỳnh Thị Kẩm Huyên hơnơ̆ng chă hŏk hơlen, pơhrăm hơnơ̆ng vă pơm jang tơnăp sơnong jang kơdih po. Vei trŏ nhen nơ̆r pơkăp hăm kơdih po, duch hlôi kơ-'nôh hŏk pơhrăm păng dang ei hlôi hŏk đang Chuyên khua 1 – Nô̆i khua.

Tơdrong jang tơ̆ hnam pơgang adoi hrat, mă lei hăm minh ƀak si drăkăn nhen Huyên roi hrat hloh dơ̆ng. Dôm tơdrong jang kâ̆p kư̆u măng năr, dôm bơngai jĭ ăl noh athei mă hơdral păng pơkăp tơtenh... noh hrat tơpă. Mă lei Huyên tam mă layơ kơdŭn tơ̆ rŏng. Mă kăl, ah hnam pơgang sơng lơ bơngai jĭ noh kon pơlei Khmer, unh hnam hin dơnuh đei dêh char tơgŭm gah ƀao hiêm hơmet jĭ jăn, tơdrong hlôh vao oei kơđeh: “Kon pơlei po kơdih oei tơjê̆ thĭ trâ̆n noh oei băt tơdrong ou to ah năm khăm jĭ, mă lei dôm bơngai oei tơring hơtaih hơtŏ tơnap tap tơpă. Oei đei đe yă ƀok kră năm truh hnam pơgang mă ưh đei 'nhŏng oh dah mă kơyuơ tơdrong hơrih tơnap tap noh unh hnam ưh đei jên kiơ̆ hadoi vei lăng. Đei bơngai jĭ ưh đei jên, noh nhôn hơvơn băl chă tơra răt por, đak nhă dah mă dôm tơmam drăm kăl yua lơ̆m hơmet jĭ jăn”.

Ƀak sih CK1, Kơdră Anih jang Pơgang Hơmet jĭ jăn apŭng Châu Thành sơkơ̆t hơdah: ƀak si Kẩm Huyên jĭ thâi pơgang hơgei dăp đon dăp bơnôh hăm bơngai jĭ jăn, tơnăp hăm sơnong jang păng hơgei gah tơdrong jang, đei bôl boăl khul jang băt 'mêm: “Gah tơdrong juăt jang lơ̆m chă khăm, hơmet jĭ, lăng atŭm ƀak si Kẩm Huyên jĭ minh lơ̆m dôm ƀak si hơgei kơ anih jang. Mă kăl noh tơdrong kloh klĕch hlôh vao lơ̆m tơdrong hơmet jĭ; mă 2 noh gah tơdrong pơma xa hăm bơngai jĭ jăn. 'Nguaih kơ noh Kẩm Huyên adoi pơ-'nam chă hŏk hơlen tơdrong juăt jang, păng dang ei duch hlôi hŏk đang lăm pơkăp đơ̆ng rŏng kơ đăi hŏk”.

Hăm tơdrong hơrih tơnap pơchek pơcher, dôm tơdrong tơroi kơ đon bơnôh dơnưp dim, dăp đon dăp bơnôh hăm bơngai jĭ hin dơnuh nhen ƀak si Huỳnh Thị Kẩm Huyên tơpă athei đei kŭp yom. Hơpơi 'meh, roi năr roi đei lơ ƀak si mơlôh chĕp lơ̆m bơnôh minh plei nuih 'lơ̆ng, vă tơdrong jang khăm hơmet jĭ jăn,  mă kăl noh hăm bơngai hin dơnuh roi năr roi tơnăp hloh. Ƀak si Kẩm Huyên ưh hơdrô̆ jing tơdrong pơ-ư pơ-ang kơ unh hnam, kơ hnam pơgang, mă oei jĭ um ai ang hơdah ăn bôl buăl khul jang mơlôh rok jơ̆ng pơm kiơ̆.