Dêh char Gia Lai oei hơtŏk hrĕnh tơdrong hơmet ming Anih vei lăng tơ̆ xăh kiơ̆ trong tŏ sĕt bơngai, jang gơ̆h hơgei, đei yoa, tơjur đơ̆ng 218 xăh jing pă 77 xăh, pơih trong ăn Khul kơdră pơgơ̆r 2 tăl bơ̆ jang rơgei, đei yoa ‘lơ̆ng. Kiơ̆ tơdrong jang hlôi đei drơ̆ng nơ̆r, Khul kơdră pơgơ̆r tơ̆ xăh ‘nao lơ̆m dêh char Gia Lai đei bơngai jang jô̆ păh lăp dang 32 ‘nu bơngai 1 xăh (ưh đei jô̆ găh Grŭp Đảng, khul tơpôl). Khul kơdră chĕp kơ̆l xăh ‘nao đei rơih kiơ̆ tơdrong hơgăt hăm khul kơdră apŭng hrei ‘nâu.

Đĭ đăng ƀiên chê̆ tơ̆ apŭng hrei ‘nâu gô đei ăn jur bơ̆ jang tơ̆ xăh ‘nao, pơm tơm lơ̆m khul kơdră pơgơ̆r, vă hơtŏk tơdrong gơh hơgei mưh bơ̆ jang. Hơdai hăm kăt tơjur bơngai jang, dêh char oei hơlen năng păng tơlĕch trong sek tơlang tơmam tơpôl đơ̆ng rŏng kơ tơmât hơdai. Ƀok Đỗ Việt Hưng – Kơdră Anih vei lăng jên hu dêh char Gia Lai ăn tơbăt, Anih âu oei jang hơdoi hăm dôm tơring chă hơlen năng đĭ đăng tơmam tơpôl păng jên thu mong, tơlĕch jang, tơlĕch trong hơmet mă lăp ‘lơ̆ng.