Lơ̆m kơsô̆ 22 tŏ hnam kăl  đei man 'nao tơ̆ xăh Gào, plt Pleiku, unh hnam ƀok Siu Kra (tơ̆ plei C) đei rơih man pơlong năng hơdrol. Ƀok Siu Kra tôch hơiă pơma: “Inh hơiă dêh, bơnê kơ plt tơgum ăn unh hnam nhôn, jĭ unh hnam pơmat tat, ưh đei jên vă pơm hơmet ming hnam, man dơ̆ng hnam ‘nao, klo kăn măr nhi hiôk sơđơ̆ng jơhngâm, bơih.”

Kiơ̆ trong vă jang, plt Pleiku vă man ‘nao 41 tŏ hnam păng pơm hơmet ming 28 tŏ hnam, hăm jên tơgŭm 60 triu mưh man hnam ‘nao păng 30 triu mưh pơm hơmet ming. Ƀok Trịnh Duy Thuân, Bí thư Đảng plt Pleiku, ăn tơbăt: “Plt Pleiku vă sut pơđĭ 69 tŏ hnam hiăk hiok, man ming plơ̆ng dơ̆ng, nhôn chih hơdăh khei ‘năr jang đang ‘nŏh lơ̆m khei 4/2025, athei rim anih jang, tơring tơrang tơgŭm tôch ai. Hăm khei ‘năr ưh kơ lơ thoi noh, dôm anih jang, khul linh, khul grŭp tơpôl, tơring tơrang hơtŏk đon tơgŭm băl, khŏm bơ̆jang đei tơdrong ‘nâu kiơ̆ tơdrong hơgăt păng trong jang hlôi tơlĕch.”

Pơma găh tơdrong vang tơgŭm bơ̆ jang sut pơđĭ hnam hiăh hiok, Trung tá Ngô Văn Phôi, Phŏ Kơdră chĕp kơ̆l Trung đoàn 48, Sư đoàn 320, Quân đoàn 34, pơma hơdăh: “Nhôn pơjing anih pơgơ̆r jang, pơjing dôm grŭp bơ̆ jang păng jang hơdoi kơjăp hăm tơring, mă loi jĭ pơlei pơla, hơmet ‘lơ̆ng anih oei xa, tơlĕch man hnam trŏ hăm tơdrong hơgăt vă jang đang ‘lơ̆ng tơdrong jang đơ̆ng Khul kơdră  teh đak păng tơring tơlĕch.”

Kŭm hăm Pleiku, đĭ đăng tơring lơ̆m dêh char Gia Lai oei hăt jang pơkĕh tơdrong tơdrong jang sut pơđĭ hnam hiăh hiok lơ̆m jăl khei mă II/2025. Jĭ 1 lơ̆m dôm bơngai đei tơgŭm man ăn hnam ‘nao, mŏ Puih Lý (plei Đe Chi, xăh Ia Pếch, apŭng Ia Grai) chơt hơiă pơma: “Teh đak tơrek truh, vang tơgŭm man ăn hnam păng pơjao ăn 1 pôm rơmo, sơnăm truh klo kăn măr nhi vă adrin jang xa pơm thoi yơ vă gơ̆h klăih đơ̆ng tơnuh, đei tơdrong ‘lơ̆ng vă rong kon hơ ‘lơ̆p hŏk pơhrăm”

Yă Phạm Thị Kim Tuyến, Phŏ Kơdră vei lăng kon pơlei xăh Ia Pếch, tơƀôh đon hơiă găh tơdrong đei yoa đơ̆ng tơdrong jang ‘nâu: “ ‘Nâu jĭ tơdrong jang tôch tih păng gĭt kăl hăm bơngai tơnuh. Truh dang ei xăh oei đei dang 20 unh hnam pơmat tat găh hnam oei, xăh jang hơdoi hăm anih jang kơpal hơlen năng mă ‘lơ̆ng vă tơdrong jang âu gơ̆h đei yoa ‘lơ̆ng hlŏh mưh tơlĕch jang.”

Kiơ̆ trong jang, dêh char Gia Lai tơlĕch đon pơhnŏng man đang păng pơm hơmet ming hlŏh 8.400 tŏ hnam lơ̆m jăl khei mă 2/2025. Vă bơ̆ jang tơdrong jang sut pơđĭ hnam hiăh hiok lơ̆m dêh char, Gia Lai kăl đei jên tŏk truh 460 ti hlak jên. Lơ̆m noh Trung ương tơgŭm ăn dêh char 241 ti, 87 ti ‘nŏh jên ‘mơ ‘met mưh tơlĕch jang 5% đơ̆ng dêh char păng dôm tơring. Ƀok Hồ Văn Niên, Bí thư Đảng dêh char Gia Lai ăn tơbăt, dêh char oei hơnơ̆ng hơdrin mong akŏm jên, tơmam oei ưh tam mă tôm vă jang đang tơdrong hơgăt đei tơlĕch.

“Oei đei dang 127 ti, dêh char tam mă đei kơna athei hơnơ̆ng krao hơvơn tơpôl tơgŭm, athei anih pơgơ̆r jang kơ dêh char hơnơ̆ng bơ̆ jang hăm dôm anih jang kơ Trung ương mă loi ‘nŏh Anih Trung ương MTTQ Việt Nam vă iŏk đei dơ̆ng tơdrong tơgŭm hăm Gia Lai. Dôm bơngai jang lơ̆m Anih pơgơ̆r jang kơ dêh char, hơtŏk đon tơnăp, hơlen năng, pơtho tơƀôh păng băt hơdăh tơdrong jang tơ̆ dôm tơring hlôi đei pơjao, roi tơbăt dôm tơdrong jang đei mă hơdăh păng Anih pơgơ̆r jang kơ dêh char pơgơ̆r hôp hơnơ̆ng rim khei vă hơlen năng dôm tơdrong jang đei mưh bơ̆jang tơdrong ‘nâu lơ̆m rim khei”./.