Vang akŏm jơ tơƀơ̆p bơngai tang măt dôm anih mơdro sa kŭm hăm Kơdră Anih vei lăng kon pơlei dêh char Gia Lai, oei đei dôm Phŏ kơdră Anih vei lăng kon pơlei, kơdră vei lăng 1, 2 anih jang kơpal, anih jang ƀơm truh. Tơ̆ âu, ƀok Rah Lan Chung tơƀôh đon ‘meh vă tơdrong jang “Cheh phe hăm bơngai mơdro sa” gô jing 1 hơnih pơma dơnuh kơtă tơgŭm khŭl kơdră chĕp kơ̆l răp mơ̆ng nơ̆r tơgop, tơroi đơ̆ng anih mơdro sa, hơdai hăm tơroi đei 1,2 tơdrong mơmat tat, tơhlăk tơhlĭn lơ̆m kơplăh bơ̆jang. Lơ̆m jơhngơ̆m đon rơhâu, tang măt dôm anih mơdro sa hlôi vang tơroi găh tơdrong jang, hơdai hăm tơroi ăn 1,2 tơdrong mơmat tat, tơhlăk tơhlĭn.

Kơdră chĕp kơ̆l dêh char păng dôm anih jang kơpal, anih jang ƀơm truh hlôi kơtă pơma dơnuh, chih iŏk. Kơdră chĕp kơ̆l Anih vei lăng kon pơlei dêh char Gia Lai ‘meh vă tơpôl mơdro sa hơnơ̆ng vang yak hơdai, tơgop dôm tơdỏng tơchĕng ‘nao, vang tơgŭm pơjing Gia Lai jing hơnih truh hơiă ăn tơmơ̆t jên jang, tơgop pơtrŭt hơtŏk tơiung mŭk drăm - tơpôl tơring. Kiơ̆ trong tơlĕch jang, tơdrong jang “Cheh phe hăm bơngai mơdro sa” gô đei pơvei hơnơ̆ng lơ̆m pơgê năr puăn rim giĕng.