Pơyan iŏk linh sơnăm 2025 ‘nâu tơ̆ Đắk Lắk đei 2.553 ‘nu linh hle năm bơ̆jang tơ̆ dôm kơđông linh găh dêh char Đắk Lắk, kŭm hăm 1,2 kơđông linh găh Anih tơn vei lăng khul linh teh đak, Quân khu V oei lơ̆m dêh char.

Đại tá Niê Ta, Yŏng Anih chĕp kơ̆l pơgơ̆r khul linh dêh char, Phŏ Kơdră Khul rơih bơngai pơm linh kơ dêh char Đắk Lắk ăn tơbăt, lơ̆m pơyan pơtâp pơhrăm âu, dôm kơđông linh vă jang ‘lơ̆ng tơdrong pơtâp pơhrăm găh tơdrong jang chinh trĭ păng đon tơchĕng, hơtŏk hơnăp jang ăn rim khul chĕp kơ̆l đảng, ƀok yŏng, kăn ƀô̆, linh hăm tơdrong pơtâp pơhrăm.

Kơplăh dang ei, dôm kơđông linh hlôi iŏk tôm kơsô̆ linh hle păng oei tơlĕch trong pơtho, pơtâp pơhrăm kăl, hơtŏk tơdrong ‘lơ̆ng mưh pơtho pơhrăm hăm linh hle. Hăm đĭ đăng linh hle, hlôi hơmet hơđơ̆ng jơhngâm đon đơ̆ng rŏng dôm năr hơtăih kơ hnam tơnŏ, kơchăng truh hăm anih pơtâp pơhrăm.