Jơnŭm ‘long pơglang ƀrê dêh char Đắk Lắk oei adrin tơlĕch tơdrong “Têt ‘mêm mơnat” Pơyan Puih mak Ất Tỵ sơnăm 2025 hăm lơ tơdrong jang tôch đei yoa, tơƀôh hơdăh đon pơngơ̆t vang tơgŭm đơ̆ng tơpôl hăm dôm bơngai pơmat tat tơ̆ tơring. Têt ‘nâu, Jơnŭm ‘long pơglang ƀrê dêh char Đắk Lắk adrin hơmet têt, tơgŭm ăn hlŏh 65.000 ‘nu bơngai tơnuh, đei tơdrong arih xa pơmat tat, bơngai ƀônh đei tơdrong răm.

Vă jang đei tơdrong ‘nâu, dang ei rim khul grŭp lơ̆m dêh char oei adrin krao hơvơn khul tơpôl, anih jang, rim bơngai vang tơgŭm vă hơmet têt ăn bơngai tơnuh. Yă Trần Thị Phương Thu, Phŏ Kơdră chĕp kơ̆l Jơnŭm ‘long pơglang ƀrê dêh char Đắk Lắk ăn tơbăt: Kiơ̆ đơ̆ng dôm tơdrong jang ‘nâu, Jơnŭm hơpơi ‘mĕh ưh lăp tơgŭm găh tơmam drăm đĕch mă oei tưk tơiung jơhngâm đon ‘mêm mơnat, tơgŭm băl lơ̆m tơpôl hai, vă rim bơngai gơ̆h xa Têt chơt hơiă, ‘nă hal, hiôk chơt.