Hăm hơnăp jang jĭ mĭnh ‘nu bơngai chĕp kơ̆l đoàn, mŏ Rơ Châm Byich, tơring Ia Krái, apŭng Ia Grai, ling lang yak hơdoi hăm đoàn viên hơdruh tơdăm lơ̆m tơdrong jang. Mŏ hlôi pơjing khul “Năm iung jang ‘mêm mơnat” tơgŭm djru dôm bơngai tơnap tap hăm dôm tơdrong jang ‘lơ̆ng hơ iă nhen pôk tơmam drăm ăn rim ŭnh hnam dơnuh, tơgŭm djru hŏk tro ŭnh hnam tơnap tap năm hŏk pơhrăm dơ̆ng.

Hăm iung jang tơnăp, mŏ Rơchâm Byich hlôi sơng iŏk đei lơ hla bơar hôn bơnê đơ̆ng kơdră kơpal. Mŏ tơbăt: “Ba limg lang ‘meh vă đei tơdrong jang yă kiơ ‘noh ‘lơ̆ng rŏ, kơna kơ dih ba hơnơ̆ng hok pơhrăm dôm tơdrong hơ iă vă kon pơlei vang hŏk pơhrăm pơm kiơ̆. Đei tih vơ̆ djơ̆ ‘lơ̆ng lơ̆m ŭnh hnam jang kĕch mang, kơna ba băt hơdăh tơdrong kăl kơ hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô. Truh sơnăm 2024 ĭnh sơng iŏk đei tơmam hơpăh 15/10, ba chhôk dêh. Ba tơchĕng bơ̆n jang jĭ vă kơ plang ăn ưh kơ hơmŏ sơng iŏk đei tơmam hơpăh ou ôh. Bơnê kơ khul kơdră Trung ương, tơring hlôi lăng tông nông gia. Kơdih ba truh ou kơnh gô hơdrin hloh dơ̆ng lơ̆m rim tơdrong jang”.

Sơnăm hŏk ou ki, Nguyễn Hà Bảo Khanh, hŏk tro lăm 12C1, Hnam trương jăl pêng Chuyên Hùng Vương, pơlei tơm Pleiku, jĭ hŏk tro kăl hloh kơ dêh char Gia Lai đei Trung ương Đoàn Hơdruh tơdăm Cộng sản Hồ Chí Minh pôk ăn hơnăn “Hŏk tro 3 ‘lơ̆ng” kơ Trung ương. Ư̆h khan lăp hơdrô̆ hơgei lơ̆m hŏk pơhrăm, oh oei tơnăp rim tơdrong jang đoàn khul. Oh jei vang iung jang păng iŏk đei lơ tơmam hơpăh gĭt kăl rim ‘măng pơlong lơ̆m dêh char păng Trung ương găh chă tơchĕng hơlen khoa hŏk kih thuơ̆t, tơchăr pơjing tơdrong jang păng pơm pơjing robot. Nguyễn Hà Bảo Khanh tơbăt: “Lơ̆m rim ‘măng pơlong ‘noh jei hơnhăk đei lơ tơdrong rơvơn ăn rim bôl boăl hŏk tro, ưh khan lăp tơdrong lui tơ̆ hơnăp mă oei jing tơdrong vang iung jang kiơ̆. Mưh tơƀơ̆p rim bôl boăl vang pơlong atŭm hăm ba ‘noh ba jei đei hŏk pơhrăm kiơ̆ lơ tơdrong hơ iă. Păng tôch hơ iă mưh ĭnh sơng iŏk đei hơnăn hŏk tro 3 ‘lơ̆ng trung ương, păng kiơ̆ kơ ĭnh ‘nou jing jơhngơm đon hơlêm kơtang hloh vă ba hơdrin hloh dơ̆ng lơ̆m tơdrong hŏk pơhrăm.”

Kiơ̆ đơ̆ng mŏ Hồ Thị Giang Thảo, Bí thư Đoàn dêh char Gia Lai, hơdruh tơdăm lơ̆m dêh char hlôi păng tŏk bŏk jang kiơ̆ ‘lơ̆ng jơhngơ̆m đon pơm jŭk yŭk trong jang, ling lang hơdrin hŏk pơhrăm păng jang tơchăr, vang tơ iung pơjing pơlei pơla Gia Lai roi năr roi pơdrŏng ‘lơ̆ng liĕm:“Nhôn gô hơnơ̆ng tơlĕch lơ trong jang vă jang kiơ̆ Nơ̆r athei jang kiơ̆ kơsô̆ 05 đơ̆ng Hơnih tơm chinh trĭ găh atŏk kơtang hŏk pơhrăm, pơm kiơ̆ trong bơ̆ jang jơhngơ̆m đon ‘lơ̆ng, trong jang hơgei kơ Ƀok Hô. Atŏk kơtang tơdrong chĕp pơgơ̆r kơ Đảng hăm bơ̆ jang pơtho pơhrăm jơhngơ̆m đon ‘lơ̆ng kĕch mang, hơrih sa gơ̆h găt, ‘lơ̆ng hơ iă ăn jơhnơr mơlôh atŭm hăm pôk bơnê, lang să dôm bơngai ‘lơ̆ng, tơdrong ‘lơ̆ng kơ đoàn. ‘Ngoăih kơ ‘noh hơnơ̆ng atŏk kơtang păng tơlĕch jang kiơ̆ iung jang kiơ̆ “3 tơgoăt tơgoăl” vă hơdruh tơdăm Gia Lai gô hơnơ̆ng vang iung jang hơdoi hăm rim kơdră tơring vă tơ iung pơjing, pơrô̆ pơrôp hơdruh tơdăm vang iung jang tơ iung pơjing tơring tơrang ‘nao, tơring kơdrơ̆m gơ̆h găt.”