Tơdrong vă jang tơmơ̆t jên jang ming man trong gre treng Lào Cai - Hà Nội - Hải Phòng hăm hơnih trong tơm trơ trơp trong gre treng găn hloh sơlam teh đak ƀar păh hơnih gre treng dơ̆ng Lào Cai hăm hơnih trong gre treng dơ̆ng Hà Khẩu Bắc (Trung Quốc), hơnih tuch luch hơnih dơnŏk Lạch Huyện, Hải Phòng. Trong gre treng ou hơtăih 391 km păng 3 jăl trong klăh dang 28km. Trong gre treng ou găn hloh 9 dêh char, pơlei tơm: Lào Cai, Yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương păng Hải Phòng. Akŏp kon jên tơmơ̆t jang dang 203.230 ti hlak jên, hăm kon jên tơmơ̆t jang ‘noh teh đak. Hơdrin truh sơnăm 2030 ming man keh đang. Tơ̆ Hop akom, Kơdră chĕp pơgơ̆r Kuô̆k hô̆i Trần Thanh Mẫn lăp đon hăm tơdrong kăl tơchơ̆t tơmơ̆t jên jang pơm trong gre treng Lào Cai - Hà Nội - Hải Phòng. Kơdră chĕp pơgơ̆r Kuôk hô̆i pơkă athei akŏm pơm hơdăh trong pơprŏ păng trong tơmơ̆t jên jang. Athei dăr lăng mă hơlen, rơ̆ih trong tơlĕch ‘lơ̆ng hơ iă hloh lơ̆m tơgoăt iung jang kơ Tơdrong vă jang hăm trong gre treng teh đak, trong gre treng tơring kơdrơ̆m, trong gre nơnăm anai; pơm lơ liơ vă trong gre treng ou hoei gan mơ̆t lơ̆m pơlei pơla.