Iung pơma tơ̆ Hop akŏm, Tổng Bí thư Tô Lâm tơbăt dơ̆ng dôm tơdrong iŏk đei jơnei gĭt kăl lơ̆m đĭ đăng tơdrong jang kơ Teh đak sơnăm 2024, pơma hơdăh lơ̆m dôm tơdrong iŏk đei ou hlôi đei tơdrong tơgop tih tên đơ̆ng rim Kơdră so, rim kơdră kĕch mang so păng lơ bơngai hŏk jrŭ lơ̆m teh đak păng bơngai Việt Nam oei tơ̆ teh đak đe. Găh tơdrong jang truh ou kơnh Tổng Bí thư sơkơ̆t hơdăh, vă hơnơ̆ng iŏk jang hơnăp jang kơ chăl sơnăm hơnhăk teh đak yak pran kơtang năm truh chăl hle, khei năr ou kơnh, bơ̆n kăl hơnơ̆ng tơplih ‘nao pran kơtang trong chĕp pơgơ̆r, pơm hơtŏk kĕ chĕp pơgơ̆r kơ Đảng. Pơma truh tơdrong jang tơm ‘noh atŏk tơ iung mŭk drăm-tơpôl, Tổng Bí thư akhan, pơ đĭ khul chinh trĭ adoi kăl akŏm jang kiơ̆ jơnei trong jang tŏk kơtang, tơ iung pơjing tơdrong jang khoa hŏk, kmăi kmŏk, tơplih kơsô̆.