Kiơ̆ tơroi hơkŏp pơm kiơ̆ Tơchơ̆t 18, dêh char Đăk Lăk hlôi tơlĕch lơ trong nhen 'lơ̆ng nhen tơdrong tơmơ̆t kơchư̆k Kơdră anih jang Hơvơn kon pơlei păng Kơdră Anih jang Măt trâ̆n tôh kuôk dêh char, tơmơ̆t hadoi dôm Đảng ƀô̆ Khô̆i kơ dôm anih jang ăn teh đak păng Đảng ƀô̆ Khô̆i kơ dôm anih jang mŭk drăm lơ̆m dêh char. Dêh char hlôi tơjur đei 10% ƀiên chê̆ pơtêng hăm sơnăm 2015, tơjur 30 lăm jang, anih jang, atŭm hăm noh tơjur 40 anih jang lơ̆m dôm anih tơm.

Khei năr truh, Đăk Lăk pơm kiơ̆ dôm trong jang tơmơ̆t hadoi minh ƀar anih jang vă tơjur păng hơtŏk pơ-'lơ̆ng tơdrong jang pơgơ̆r vei lăng. Ƀĭ thư Tĭnh uy Đăk Lăk Nguyễn Đình Trung ră hơdah, tơdrong hơmet pơ-'lơ̆ng bot anih jang athei mă khua hŏk, trŏ hăm tơdrong jang tơ̆ tơring, atŭm hăm noh hơtŏk pơ-'lơ̆ng tơdrong jang kang ƀô̆.