Hop akŏm pơgơ̆r lơ̆m khei năr tôm anih jang chĭnh trĭ hăt hot oei pơm kiơ̆ dôm sơnong jang pơkăp bot 'lơ̆ng jơnŭm pơgơ̆r anih jang. Gah tơdrong ou, Kơdră Kuôk hô̆i Trần Thanh Mẫn ăn tơbăt, jăl mă 1, rim anih jang tơm, anih jang tơ̆ tơring hlôi pơkăp bot 'lơ̆ng jơnŭm pơgơ̆r anih jang, jăl mă 2 gô hơmet ming Khôi luơ̆t, hơmet minh ƀar luơ̆t păng pơkăp 50% rim anih jang hanh chĭn kơ dêh char. 'Măng hop akŏm mă 9 gô vă hôp lơ̆m 2 khei, lơ̆m khei năr ou gô iŏk nơ̆r tơgop đơ̆ng kon pơlei gah tơplih Khôi luơ̆t.

Mă kăl, đơ̆ng hơtuch khei 4 truh blŭng khei 5, Anih jang kơpal kơ Kuôk hô̆i adoi gô hop akŏm lơ 'măng vă pơkăp anih jang hanh chĭn tơ̆ xah. Dôm tơdrong chih akŏm luơ̆t pơma đam ah Hop akŏm 'măng mă ou hơmet lơ tơdrong phara băl, lơ̆m noh đei dôm luơ̆t kăp gĭt, tơrĕk truh tơdrong jang pơm tơlĕch tĕch pơdro tơmam drăm păng jơnŭm jang mŭk drăm.