Tơchơ̆t 57-NQ/TW đei Anih tơm Chĭnh trĭ tơlĕch iŏk yua ah năr 22/12/2024, ră hơdah hơtŏk khua hŏk, kŏng ngê̆, tơplih 'nao gơh hơgei păng tơplih kơsô̆ tŏk bŏk jing tơdrong kăp gĭt hơtŏk tơ-iung kơ teh đak; jing trong jang dơnơm, tơnăp hloh vă teh đak bơ̆n tŏk pơdrŏng, pran kơtang lơ̆m anglŏ sơnăm jang 'nao – chăl sơnăm hơtŏk tơ-iung kơ teh đak. Jơnŭm pơgơ̆r jang Trung ương gah hơtŏk khua hŏk, kŏng ngê̆, tơplih 'nao hơgei păng tơplih kơsô̆ đei tơ-iung pơjing, kơyuơ Ƀok Tổng Bí thư Tô Lâm pơm Kơdră.

Pơjing Jơnŭm tơgŭm jang kơ teh đak gah hơtŏk khua hŏk, kŏng ngê̆, tơplih 'nao gơh hơgei păng tơplih kơsô̆ hăm tơdrong vang jang đơ̆ng rim bơngai juăt jang lơ̆m păng 'nguaih kơ teh đak. Lơ bơngai juăt jang akhan, Tơchơ̆t 57-NQ/TW noh trong jang 'nao, pơchră jăl trong hơtŏk tơ-iung gah hơnăp kơ kon pơlei Việt Nam. Noh jĭ jăl trong jang kiơ̆ kơmăi kơmŏk hơgei 'nao, tơplih kơsô̆ pran kơtang, Việt Nam pơtơm hơtŏk tenh păng kơjăp vă pơdrŏng kơtang, hơtŏk hơtŏ hăm dôm teh đak lơ̆m tơring teh. Atŭm hăm noh, tơchơ̆t hơvơn pơtrŭt pran, đei trong jang tơnăp vă hơvơn bơngai hơgei păng hơtŏk tenh tơdrong jang tơplih 'nao gơh hơgei kơ teh đak. Tơchơ̆t tơbang đei tơdrong hơpơi 'meh hơtŏk tơ-iung kơ teh đak.