Tơdrong kăl ‘noh jĭ 1 lơ̆m dôm tơdrong jang yak truh tơbăt 50 sơnăm rơngei Tây Nguyên, tơring Pơbăh, rơngei teh đak, yua đơ̆ng Anih tơm vei lăng Khŭl lĭnh jang hơdai hăm Anih jang Đảng dêh char Đắk Lắk pơgơ̆r. Tơ̆ hop akŏm, đe yŏng, bơngai jang khoa hŏk păng lĭnh tơblăh sơ̆ tơblang hơdah tơdrong pơm đei jơnei ‘nâu, pơma hơdăh tơdrong pơgơ̆r gơh hơgei đơ̆ng Anih tơm Chĭnh trĭ păng tơdrong pơcheh lơ̆m trong tơblăh, pơm ưh kơ ê sơng lơ ayăt mơ̆t vă linh bơ̆n prăh pơlôch dôm hơnih gĭt kăl nhen Đức Lập păng Buôn Ma Thuột, Pleiku păng Kon Tum. Jơnei âu hlôi pơm tơdrong ‘lơ̆ng ăn tơdrong tơblăh pơm rơngei tơring pơbăh păng rơngei teh đak.

Vang truh akŏm păng pơgơ̆r Hop akŏm, Thượng tướng Lê Huy Vịnh, Phŏ kơdră Anih tơm vei lăng Khŭl lĭnh roi tơbăt, Khŭl pơgơ̆r hlôi iŏk đei vă jê̆ 90 hla ar roi tơbăt pơma dơnuh hăm lơ tơdrong, ‘lơ̆ng đei lơ hơnih lăng ‘nao găh tơblăh jơnei Tây Nguyên. Hop akŏm ‘noh jĭ ‘măng gĭt kăl vă Đảng bộ, Khŭl kơdră păng Kon pơlei dêh char Đắk Lắk roi tơƀôh truh dôm bơngai tang măt, lĭnh - kon pơlei lơ̆m teh đak dôm jơnei iŏk đei lơ̆m 50 sơnăm pơjing păng hơtŏk tơiung.