Hla bơar chih tơbăt đơ̆ng Hơnih chĕp pơgơ̆r Teh đak găh tang găn tŏ ‘mi kial pơrăm tơbăt, đơ̆ng blung sơnăm 2023 truh dang ei, tŏ ‘mi kial pơrăm tơ̆ rim tơring tơrang, pơm hiong răm lơ găh bơngai păng mŭk drăm, pơm kơnê̆ truh choh jang sa, găh lơ ‘noh ‘mi tih, đak lŏk jrŏh đak hơbông, teh tơdrŭt hơlih, tơdrŭt hơlih jĭh đak kroong, jih đak dơsĭ.

Pơma pơtôch jơ bơ̆ jang, Kơ iĕng Thủ tướng Lê Minh Khái pơma hơdăh, Khul kơdră Teh đak, Thủ tướng Teh đak lăng ba tôch kơjăp, atŭm hăm tơring hơmet pơ-‘lơ̆ng tŏ ‘mi kial pơrăm vă pơm sơđơ̆ng hơrih sa ăn kon pơlei. Pơma hơdăh tơdrong hơmet pơ-‘lơ̆ng tŏ ‘mi kial pơrăm kăl “Tĕnh koăng”, Kơ iĕng Thủ tướng Lê Minh Khái athei, rim hơnih tơm, hơnih bơ̆ jang pơma dơnuh, tơgop nơ̆r vă drơ̆ng mĭnh nơ̆r đơ̆ng noh pơtruh ăn Thủ tướng Teh đak lăng hơlen kĭ tơchơ̆t, hơmet pơ-‘lơ̆ng tơtom, jơnei, ƀlep tơdrong, ƀlep tơdrong tơchơ̆t kơ Khôi luơ̆t.