Tơdrong ming man jăl trong tih Khánh Hòa-Buôn Ma Thuột (jăl mă 3) hơtaih hloh 48 km, hăm kơsô̆ jên asong 6.765 tih hlj. Truh dang ei dôm anih ming man hlôi keh đang man trong trôm, đing pơro đak păng man đei 22 tŏ gơng, đei jơnei 75%. Mă lei, tơdrong tơlĕch jên jang pơtơm đei 1.525 tih hlj, đei 37%. Jơnŭm pơgơ̆r vei lăng tơdrong ming man trong nơnăm păng Anih Choh jang xa Hơtŏk tơring tơrang dêh char Đăk Lăk ăn tơbăt, tơdrong tơm noh kơyuơ dôm anih jang tam mă akŏm kơmăi kơmŏk vă hơtŏk jơ jang; tơmam ming man nhen teh tơmo tam mă truh tơtom.

Pơma ah hop akŏm, ƀok Trương Công Thái, Phŏ Kơdră Anih jang vei lăng kon pơlei dêh char Đăk Lăk pơgơ̆r anih iŏk ming man athei hơdrin hloh dơ̆ng vă dah pơtruh kơmăi kơmŏk gre păng bơngai jang vei sơđơ̆ng ăn tơdrong ming man jang tơnăp. Truh ah dôm anih ming man ưh đei jang tom kiơ̆ pơkăp noh athei pơdơh jang hăm anih ming man noh, anih jang tơm athei iŏk sơnong ming man, chiu pŭ sơnong jang hăm anih tơm tơlĕch ming man.