'Nâu jing tơdrong akŏm kăp gĭt lơ̆m tơchơ̆t tơbăt 50 sơnăm Năr tơblah jơnei tơring pơbah, rơngei teh đak (30/4/1975 - 30/4/2025), vă sơkơ̆t tơdrong kăp gĭt kơ Tơdrong jơnei Tây Nguyên lơ̆m tơdrong tơblah Mih dŏng teh đak. Lơ̆m pơma đam, đe yŏng linh, bơngai jang khua hŏk păng tang măt ăn dôm anih jang linh lơ̆m Binh đoan Tây Nguyên vei lăng (hơnăn tơm noh Kuân đoan 3) hlôi tơblang hơdah dôm tơdrong tơm pơjing đei tơdrong jơnei kăp gĭt ou. Đơ̆ng tơdrong pơgơ̆r gơh hơgei đơ̆ng Đảng, tơdrong pơgơ̆r hơbĕch hơbal lơ̆m trong tơblah đơ̆ng Khul linh Kon pơlei Việt Nam.

'Măng pơma đam ưh hơdrô̆ tơbăt dơ̆ng dôm tơdrong tơblah đei jơnei nuih mơng mă oei akŏm đei lơ ƀai hŏk kăp gĭt ăn tơdrong jang tơ-iung pơjing păng vei lăng teh đak hrei ou; tơgop ăn tơdrong tơjră khul pơm chư̆ kơnê̆; hơtŏk đon lui lơ̆m tơdrong hơrih kơ teh đak. Atŭm hăm noh, âu adoi jĭ 'măng vă pơtho tơdrong juăt jue kăch mang, tơ-iung đon bơnôh pơ-ư pơ-ang kơ hơdrung hơdrĕch păng tơdrong băt 'mêm kơ teh đak, mă kăl noh hăm đe mơlôh hơmuh hơmŏng.