Năr 26/4/1975, đơ̆ng rŏng kơ khei năr akŏm tơdrŭt kơtang, yak rah tơdrŭt rah lơ̆m tơring, asong khul linh, 5 binh đoan dơnơm kơ Khul linh tơblah pơrơngei asong jing 5 trong hrơ̆p minh 'măng tơdrŭt truh anih tơm kơ pơlei tơm Sài Gòn - Gia Định.

Linh so Đoàn Đình Điểu tơƀlŏk dơ̆ng: Sư đoàn ƀô̆ ƀinh 968, Kuân khu 4, iŏk sơnong athei tơblah tơpăi anih ayăt tơ̆ Đồng Dù (Củ Chi), pơm trong hiôk vă khul linh bơ̆n tơdrŭt mơ̆t truh Sài Gòn. Năr 29/4, mă ƀôm 'mrơ̆m tơjruh đơ̆ng đe ayăt, hăm tơdrong pơkăp lôch hơrih kơyuơ teh đak, ƀok păng khul grŭp hlôi yuk hơlou pơih trong: "Tôm sư đoan 968 nhôn iŏk tơchơ̆t pơih 4 anih tơdrŭt: gah Pơmơ̆t, Pơmơ̆t Pơbah, gah Hlĕch Pơbah, gah Tu. Nhôn drŭt mơ̆t, khul nhôn pơtoi drŭt truh sir hơlŭng, kơlih anih noh ưh đei tơm 'long, gah rŏng noh bri kơsu, oei gah hơnăp noh na ƀa... Nhôn athei mơ̆t 3 'măng pơtơm gơh pơih đei trong vă tơdrŭt tơblah".

Ƀlŏk dơ̆ng jơnăr tôch gĭt kăl lơ̆m tơdrong tơblăh mưh gre nar 390 tâm păk dur ‘măng jang Dinh Độc Lập, linh so Ngô Sỹ Nguyên, linh gre nar 390 ăn tơbăt: “Tơdrong tơblăh Hồ Chí Minh tôch hrĕnh, iŏk đei jơnei tôch ‘lơ̆ng. Păih trong tơblăh găh Hơlĕch, quân đoàn 2 nhôn đei 2 tŏ gre nar truh hrôih hlŏh ‘nŏh 843 păng 390, jĭ 2 tŏ gre kơ Đội trưởng Bùi Quang Thận păng Bơngai jang chinh trĭ Vũ Đăng Toàn. Gre nar 390 nhôn rĕn ga tâm hŭt dur ‘măng jang mât tơ̆ Dinh Độc lập, dơ̆ng tang ăn jơhngâm pran đơ̆ng Khul linh kon pơlei Việt Nam tơblơ̆ hŭt 1 chăl pơgơ̆r, dơ̆ng tang ăn tơdrong hơpơi ‘mnĕh rơngei hiôk hian đơ̆ng hơdrĕch Việt Nam. 21 sơnăm iung tơblăh tôch pơmat, chu lôch hŭt hơkâu ‘mơ̆i mă gơh đei jơ pơnĭt ‘nâu.”

Lơ̆m năr tơbăt “T/đ hơkŏp jing minh”, ƀok Hồ Việt Hà, tơ̆ kuâ̆n Long Biên, Hà Nội ƀlŏk hơdơ̆r: “Inh truh tơ̆ ou lơ̆m đon vơch kơ năr 30/4, tơbăt 50 sơnăm tơblah jơnei Sài Gòn. Kơdih po inh tih vơ̆ găn ga đơ̆ng tơdrong tơblah Mi, đơ̆ng rŏng kơ noh tơdrong tơblah vei lăng sơlam teh gah Tu, gah Pơbah. Kơplah ou hơdơ̆r inh mah vơch lĕch đak măt jơjrơ̆k. Inh ‘meh hơlen lăng dơ̆ng dôm kơjă kăp gĭt ou vă tơblang minh tơdrong: kơlih kiơ Đảng păng Ƀok Hô pơgơ̆r teh đak găn ga khei năr tơblah Phalăng, tơjră Mi păng kon pơlei đơ̆ng Tu truh Pơbah hlôi tơrĕk truh minh tơdrong tơblah vă pơjei iŏk tơdrong rơngei ăn teh đak thoi yơ”

Găh tơdrong tơblăh tơdrŭt đơ̆ng dôm Quân đoàn lơ̆m tơdrong tơblăh Hồ Chí Minh gĭt kăl, Đại tướng Phạm Văn Trà, sơ̆ pơm Kơdră tơm vei lăng khul linh teh đak, ăn tơbăt, Trung ương tôch hơgei, bơ̆ jang tôch tơnăp pơgơ̆r 5 trong tơblăh tơdrŭt.

Păng hơdai hăm jơhngâm pran khul linh, chinh trĭ, tơdrong jang krao hơvơn kon pơlei, krao hơvơn khul hơyăt kŭm đei lơ tơdrong hơiă, pơm ăn hơyăt tơklăh dih dih. 

“Bơ̆n tơblăh iŏk rơngei đĭ đăng tơring Pơbăh, kiơ̆ jơhngâm pran đơ̆ng đĭ đăng kon pơlei, kiơ̆ jơhngâm pran đơ̆ng 3 trong tơblăh mă khul linh 'nŏh jĭ tơm dơnơm. 'Nâu jĭ tơdrong chĕp kơ̆l pơgơ̆r đơ̆ng Đảng bơ̆n, đơ̆ng Anih tơm Chinh trĭ tôch rơgei. Chĕp kơ̆l pơgơ̆r tôch rơgei dơ̆ng 'nŏh jĭ, adrol kơ 'nŏh mưh Quân đoàn 4 ưh gơ̆h tơblăh mât tơ̆ Dinh Độc Lập yoa oei pơmat tat tơ̆ Xuân Lộc ‘nŏh athei Quân đoàn 2 yak hlŏh đak krong Đồng Nai drŭt mât. Đơ̆ng rŏng kơ Dương Văn Minh pơma nơ̆r thuơ, kŭp kơ̆l yơ̆r ti, kon pơlei tơ̆ jơ̆p tơring găh Pơbăh vang iung tơblăh hơdai hăm khul linh tơ̆ tơring, iŏk rơngei đĭ đăng tơring. Tơdrong chĕp kơ̆l pơgơ̆r đơ̆ng Đảng tơ̆ 3 trong tơblăh khul linh- chinh trĭ- krao hơvơn kon pơlei, krao hơvơn hơyăt iŏk đei jơnei 'lơ̆ng thoi noh 'mơ̆i mă bơ̆n gơ̆h tơblăh iŏk rơngei đĭ đăng tơring pơbăh, pơjing đei mĭnh teh đak kơjăp 'lơ̆ng.”