Tơdrong kăp gĭt hloh lơ̆m dôm năr ou ki 'noh Lêh tơbăt 50 sơnăm Năr Tơblah jơnei tơring pơbah, rơngei teh đak ah năr 30/4 tơ̆ pơlei tơm Hồ Chí Minh. Lêh tơbăt kăp gĭt grasia hăm tơdrong vang akŏm đơ̆ng kơ rơbăn kon pơlei păng tơmoi đơ̆ng teh đak đe.

Lêh tơbăt 50 sơnăm Năr jơnei rơngei teh đak đei 48 khul grŭp, hăm pơhlom 13.000 'nu bơngai vang akŏm pơrok pơdah. Khul Trung Quốc, Lào păng Campuchia atŭm vang akŏm pơrok pơdah lơ̆m 'măng ou. Tơ̆ Lêh tơbăt, khul linh hlôi pơnah 21 tŏ 'mrơ̆m phao kơnong hăm tơdra hơri Kuôk ka Việt Nam. Khul linh Gre păr  hơvơn dôm jĭt tong gre păr vơvêl, gre păr tơblah păr pơdah tơ̆ rơvơ̆ng plenh.  

Tơ̆ plt Hồ Chí Minh pơgơ̆r dôm jĭt anih prăh kơmlăi pơkao ăn kon pơlei năng lơ̆m năr pơjing đei 1 teh đak kơjăp ‘lơ̆ng. Gơmăng 30/4 prăh kơmlăi pơkao tôch lơ hăm  28 anih prăh đông kơđeh păng 2 anih prăh tôch kơđông lơ̆m plt.

Kŭm hăm ‘nŏh jĭ lơ tơdrong tơ̆k pơchrang unh điên tơ̆ rơvơ̆ng plenh lơ̆m kơmăng ‘năr 26/4 păng 30/4 hăm hlŏh 10.000 tŏ gre păr ưh đei bơngai huơ̆r, pơdăh tơƀôh lơ um rup tôch hơiă kơ plt HCM lơ̆m 50 sơnăm âu ki. 

Adoi tơ̆ pơlei tơm Hồ Chí Minh pơgơ̆r lơ tơdrong joh ayŏ kơdŏ suang kăp gĭt. 'Noh jĭ tơdrong pơdah tivi kơ teh đak đei hơnăn "Păr ang ling lang tơdrong hơri kơ teh đak". Tơdrong joh ayŏ kơdŏ suang kăp gĭt kơyuơ Anih tơm Joh ayŏ, Tơplŏng kơdou păng Tơmang pơhiơ̆ pơgơ̆r, jang atŭm hăm pơlei tơm HCM pơgơ̆r tơ̆ hnam tơm Thống Nhất ah năr 29/4.

Pơdah tơdra hlôm khen atŭm hăm dôm kih thuơ̆t hao aseh kơyuơ Anih tơm Kŏng an pơgơ̆r, pơdah tơ̆ tơring trong Lê Lợi păng trong năm jơ̆ng Nguyễn Huệ.

Tơ̆ Hà Nội, Tơdrong joh hơri “Pơkă Tơring KơTu - Pơbăh” pơgơ̆r tơ̆ cham đă ƀŏng lŏng Mỹ Đình, hăm tơdrong vang akŏm đơ̆ng hlŏh 800 ‘nu ngê̆ si, bơngai jŏh hơri hơxoang păng đe linh so, bơngai lăng ƀôh tơdrong tơblăh rơngei sơ̆. Tơdrong joh hơri tơmât hơdai ƀai chih, um rup chăl so, hơdai hăm tơdrong jŏh hơri hơxoang chăl ‘nao.

Mă loi ‘nŏh tơdrong đei măt đơ̆ng 2 tŏ gre nar T54, kơloăi gre  đei yoa lơ̆m tơdrong tơblăh Mi. Pơkă tơring Kơtu Pơbăh đei anih pơgơ̆r tôch ‘lơ̆ng, hăm 2 anih plŏh lĕch băl tơƀôh hơdăh 2 tơring Găh Tu Pơbăh, tŏk bŏk ‘nŏh gơng Hiền Lương. Kŭm hăm ‘nŏh jĭ pơih pơdăh rup 3D mapping ‘măng mă blŭng đei ƀôh lơ̆m dôm tơdrong joh hơri hơxoang.

Hơdrol 'noh, tơ̆ Hnam akŏm Thống Nhất (Gru gra kăp gĭt kơ teh đak Dinh Độc Lập) pơgơ̆r tơdrong joh ayŏ kơdŏ suang hơnăn “Teh đak sô̆ hơ-iă jơnei keh kong”.

Tơdrong joh ayŏ đei 3 apăng: “Hơpơi đei jơnei rơngei keh kong”, “Hơpơi 'meh hơtŏk tơ-iung” păng “Hơpơi 'meh pơdrŏng pran kơtang”; đei pơtơm kiơ̆ tơdrong hơri hơ-'mon, đei hloi hơri, hơsuang, tông, tơroi tơbăt... hlôi pơdah dơ̆ng dôm jăl kơ jơhnơr hơrih nuih mơng kơ kon pơlei, teh đak păng sơkơ̆t anih dơ̆ng kăp gĭt kơ Tơdrong jơnei tih pơyan Puih mak 1975.