Apŭng Krông Bông, dêh char Đắk Lắk oei sa tơ̆ hơla jơ̆ng kông Chư Yang Sin chhing kơjung. Dôm năr hơmet ăn lêh cheh phe, tơbăt 50 sơnăm rơngei dêh char, rim jăl trong hơtol hla kơ ƀrŭng ƀrăng; dôm hơnih tơmang lăng đei hơmet pơrŏ, pơm ‘nao hăm lơ ‘long pơm pơrŏ ‘lơ̆ng, vă sơng tơmoi. Kông kơjung, bri teh đak păng dôm pơlei tơ ter jơ̆ng kông Cư Yang Sin, ưh khan lăp jing dôm hơnih truh hơiă ‘măn ăn tơmoi hưch hanh kơ tơmang lăng lơ̆m tơpôl, chă lăng cham char bri brăh... mă oei jing hnam trưng hŏk lơ̆m hơgăt teh găh jơhngơr hơrih 10 sơnăm tơblăh hŭt ayăt Mi (1965-1975), jing hơnih bri pĕng kach mang, bri pơvang găn lĭnh ayăt. Đĭ vă jê̆ 100 sơnăm, ƀok Lê Chí Quyết, sơ̆ pơm Phŏ Bí thư Đảng dêh char Đắk Lắk, oei ƀlŏk hơnơ̆ng 10 sơnăm bơ̆jang đơ̆ng kơdih tơ̆ tơring kăn kư̆ ‘nâu:

“Anih bơ̆jang Đảng dêh char, anih pơgơ̆r jang mă blŭng kơ găh Pơbăh âu, ‘noh đei Anih bơ̆jang Đảng dêh char: kơdră, phŏ kơdră anih jang, dôm bơngai jang văn thư, teh kơmăy, vei răk... ‘Măng hop akŏm mă blŭng đơ̆ng khŭl chĕp kơ̆l pơgơ̆r Anih jang Đảng tơ̆ âu pơma dơnuh 2 tơdrong, mă hơdrol ‘noh athei tang găn, vei kơjăp kơ đông păih pơbăh ưh kơ lê̆ ayăt mơ̆t tơblăh, hơdai hăm pơjing dar deh jing tơring kăn kư̆, vă tơgoăt hơdai jing tơring kăn kư̆ ‘lơ̆ng kơ dêh char đơ̆ng păh Tu truh tơ̆ păih Pơbăh”.

Hăm Bơngai pơtho hŏk Hà Ngọc Đào, sơ̆ pơm Kơdră Anih vei lăng găh Pơtho pơhrăm Đắk Lắk, tơring kăn kư̆ H9-Krông Bông jing hnam trưng hai, jing hơnih tơblăh păng kŭm jing mir đak lar hai, yua kơ dôm thây kô mơlôh pơtruh ăn kơ Đắk Lắk hlôi bơ̆jang hơdai 3 hơnăp jang: pơtho hŏk, pơm tơlĕch phe ƀa păng vang iung tơblăh. Ƀok Hà Ngọc Đào ƀlŏk dơ̆ng, H9 kŭm jing tơring teh pơjing đei lơ bơngai nuih mơng:

“Ĭnh mơ̆t tơ̆ âu sơnăm 1965, truh năr rơngei ‘noh oei tơ̆ âu 10 sơnăm. Lơ bơngai đei rơka đơ̆ng âu păng kŭm jang đei đơ̆ng âu. Đei dôm bơngai nuih mơng, nhen bơngai nuih mơng Y Ơn, jang đei đơ̆ng tơdrong jang du kích, tơdrong jang kach mang tơ̆ Krông Bông. Bơngai nuih mơng Ama Lê - lĭnh nuih mơng kŭm jang đei đơ̆ng âu đang kơ ‘noh lôch hơchăng păng đei pôk hơtŏk bơngai nuih mơng. Kơna ƀơ̆t vih hơlơ̆k tơ̆ âu lơ̆m jơhngơ̆m ĭnh măh chhưu, ƀlŏk kơ đe buăl, ƀlŏk kơ ‘nhŏng oh, ƀlŏk kơ hơnih tơblăh”.

Lơ̆m tơblăh vang mơmat tat, gleh hrat, kon pơlei dôm pơlei pơla tơ̆ hơla jơ̆ng kông Chư Yang Sin kŭm ưh kơ hmach jơhngơ̆m jang, hơkâu jăn, vei lăng hơnih kăn kư̆ tơblăh, pơih să tơring rơngei. Kon pơlei dôm hơdrĕch hơdrŭng tơ̆ âu hlôi tơgŭm ăn Kach mang, vă 3 ‘măng hop akŏm Đảng bộ dêh char pơgơ̆r tơ̆ âu sơđơ̆ng. Ƀok Y Suôm Niê, oei tơ̆ plei H Ngô A, xăh Hòa Phong, apŭng Krông Bông tơroi:

 “Mĭnh ‘nu 1 tơdrong jang, mơ̆ng kiơ̆ jơhngơ̆m kơdih.Chroch hrŏng ‘noh pơjao hơgăt, pơtih gia ‘lơ̆p ‘noh kơhrĕng tŏ, bơngai ‘lŏ ‘noh rơbâu tŏ, vang tơgop vă chĕp năm hơtơ̆p hrŏng tơ̆ tơring sơlam đơ̆ng ayăt hăm lĭnh kach mang. Đang kơ ‘noh năm pơtăm ƀum ƀlang, ‘lơ̆p pơtăm 500 tơnơm, ‘lŏ pơtăm rơbâu tơnơm. Vă iŏk ƀum ƀlang ‘noh kăt iĕ, sơ̆k kro đang kơ ‘noh chĕp năm tơgŭm ăn ƀô̆ đô̆i năm tơblăh ayăt”.

 Kơlih đơ̆ng tơdrong tơgoăt pôm nơ̆r ƀơ̆r đon, 1 jơhngơ̆m đơ̆ng lĭnh păng kon pơlei hlôi pơm đei tơdrong hiôk vă Anih jang Đảng dêh char Đắk Lắk chĕp kơ̆l pơgơ̆r kon pơlei dôm hơdrĕch hơdrŭng năm đơ̆ng jơnei âu truh jơnei nai, pơm tơdrong ‘lơ̆ng iŏk đei jơnei Buôn Ma Thuột, rơngei dêh char Đắk Lắk, tơgop lơ̆m jơnei jơhngơr hơrih pơyan Puih mak 1975, rơngei teh đak. Ƀok Y Thức Êban, Phŏ Kơdră Anih vei lăng kon pơlei apŭng Krông Bông ăn tơbăt, Tơring kăn kư̆ tơblăh dêh char Đắk Lắk hlôi đei drơ̆ng ăn ‘noh jĭ hơnih gru groa jơhnơr hơrih kơ teh đak đơ̆ng sơnăm 2017, jing hơnih vă pơtho pơhrăm tơdrong joăt joe kach mang ăn jơhnơr mơlôh.

“‘Nâu jing 1 anih hơiă vă nhôn hơnơ̆ng pơtho pơhrăm tơdrong joăt joe kach mang, mă loi ‘noh jĭ hăm jơhnơr mơlôh. Tơ̆ hơnăp kơnh, tơdrong hơtŏk tơiung tơmang lăng, hơtŏk kơjă kăp gĭt jơhnơr mơlôh gô đei hơtŏk pran kơtang hloh dơ̆ng hăm tơdrong jang tôch kơ ‘lơ̆ng, mă loi ‘noh jĭ rim răih đe hơdruh tơdăm hơnơ̆ng pơgơ̆r dôm tơdrong jang pơtho pơhrăm joăt joe, ƀlŏk hơdơ̆r kŏng jang tih tên đơ̆ng đe ƀă, đe ‘nhŏng, hlôi nuih mơng iung tơblăh, hŭt hơkâu yua kơ tơdrong rơngei hiôk hian kơ pơlei pơla, kơ teh đak”.

 Đơ̆ng rŏng 50 sơnăm rơngei, tơring kăn kư̆ tơblăh sơ̆ kơ dêh char Đắk Lăk (dang ei ‘noh apŭng Krông Bông) tŏk bŏk tơplih rim năr hăm tơdrong 1 jơhngơ̆m đon pơjing đơ̆ng khŭl kơdră păng kon pơlei. Dôm pơgar mir cheh phe jing ‘lơ̆ng ƀĕnh tơ̆ tơring teh hlôi đei ayăt tơblăh phă păng săy pơgang pơnhŭl. Dôm tơdrong ‘lơ̆ng hơiă ki sơ̆ hlôi jing hơnih gru groa, gô ling lang đei lơ̆m jơhngơ̆m đon kon pơlei păng rim jơhnơr ning nai kơnh tơ̆ Krông Bông pơma hơdrô̆, Đắk Lắk pơma atŭm, jing tơdrong chhôk ‘nă găh 1 chăl tơblăh nuih mơng.