Kiơ̆ kơ ƀok Jensen, tơdrong tơm ‘măng năm ngôi âu ‘noh jĭ vă tơchă pơma dơnuh jrŭ să găh tơdrong jang tơgŭm tơbôl păng sơđơ̆ng kŭm nhen hơtŏk loi dơ̆ng jang hơdai đơ̆ng quốc hội 2 teh đak lơ̆m khei ‘năr tơdrong chĭnh trĭ tŏk bŏk tơplih tôch kơ hrĕnh. Lơ̆m ‘măng năm ngôi âu, Anih vei lăng tơdrong jang Tơgŭm Tơbôl kơ Quốc hội Đan Mạch tơƀơ̆p păng pơma dơnuh hăm dôm kơdră chĕp kơ̆l Quốc hội păng Khŭl kơdră teh đak Việt Nam găh dôm tơdrong chĭnh trĭ, tơdrong jang tơgŭm tơbôl păng sơđơ̆ng kŭm nhen pơma dơnuh tơdrong hiôk jang hơdai kơjăp hloh dơ̆ng đơ̆ng quốc hội 2 teh đak lơ̆m dôm tơdrong jang mă 2 păh vang bơngơ̆t truh.

‘Năr 3/3, khŭl Anih vei lăng tơdrong jang Tơgŭm Tơbôl Đan Mạch hlôi đei jơ hop akŏm hăm Anih vei lăng Khŭl lĭnh, Sơđơ̆ng păng Tơbôl Quốc hội Việt Nam. Tơ̆ jơ hop akŏm âu, 2 păh akŏm pơma dơnuh găh tơdrong lơ̆m apŭng plĕnh teh păng tơring, dôm tơdrong lơ pang, khôi luơ̆t apŭng plĕnh teh, tơdrong pơvei Việt Nam-Đan Mạch păng Việt Nam-EU.