Tơ̆ jơ bơ̆ jang, ƀok Trần Việt Trường tơchĕng ‘lơ̆ng tơdrong hơmet đơ̆ng dêh char Kon Tum ăn jơ bơ̆jang; ƀôh Kon Tum oei đei lơ tơdrong pơmat tat, pơlong nol, tam mă iŏk yoa đĭ rim tơdrong ‘lơ̆ng; tam đei trong tơgŭm gĭt kăl; ưh đei lơ jên, tơmam vă bơ̆jang dôm tơdrong jang… Khul dăr hơlen kơsô̆ 1922 đơ̆ng Anih tơm Chinh trĭ kŭm chih iŏk lơ tơdrong tơ̆ yăn âu mưh bơ̆jang kiơ̆ Nơ̆r tơchơ̆t kơsô̆ 123 đơ̆ng Khul kơdră chĕp kơ̆l Trung ương Đảng păng tơchơ̆t kơsô̆ 57 đơ̆ng Anih tơm Chinh trĭ.

Dêh char Kon Tum athei Quốc hội jăh set hơlen, tơlĕch tơdrong tơchơ̆t ăn 1,2 trong pơgơ̆r jang, trong tơgŭm gĭt kăl vă atŏk tơiung tơring Tây Nguyên kiơ̆ tơdrong tơchơ̆t kơsô̆ 23 đơ̆ng Anih tơm Chinh trĭ găh trong jang atŏk tơiung mŭk drăm, tơpôl păng vei lăng sơđơ̆ng ‘lơ̆ng ăn tơring Tây Nguyên truh sơnăm 2030, trong vă jang truh sơnăm 2045; apĭnh Thủ tướng teh đak, Anih tơm vei lăng ming man jăh tơrek truh, hơlen năng, tơlĕch trong tơmât jên jang pơm trong gre kơdâu hrĕnh Quảng Ngãi-Kon Tum vă pơjing tơdrong ‘lơ̆ng ăn 2 dêh char jang tŏk.