Kơ iĕng Kơdră chĕp pơgơ̆r Teh đak Võ Thị Ánh Xuân pơma hơdăh, Việt Nam ling lang lăng UNICEF nhen mĭnh hơnih jang hơdoi atŏk tơ iung gĭt kăl, đei lơ tơdrong tơgop ‘lơ̆ng hơ iă ăn bơ̆ jang vei lăng năng tông, pơtho pơhrăm păng vei lăng hơ ioh Việt Nam lơ̆m dôm jĭt sơnăm ou ki. Kơ iĕng Kơdră chĕp pơgơ̆r Teh đak tơbăt, tơdrong jang vei lăng năng tông hơ ioh ‘noh jing tơdrong jang kăl hloh lơ̆m trong bơ̆ jang atŏk tơ iung kơ Việt Nam. Hơpơi ‘meh vă khei năr truh ou kơnh UNICEF atŏk kơtang chă hơvơn kon jên hu tơgŭm djru bơ̆ jang vei lăng năng tông hơ ioh Việt Nam, jang kiơ̆ rim trong tơlĕch jang atŏk tơ iung kơjăp ‘lơ̆ng đei ƀơm truh tơ̆ đe hơ ioh, mă kăl ‘noh pơtho pơhrăm, vei lăng jơhngơ̆m pran jăng ăn đe hơ ioh, tơdrong bek ‘lơ̆ng ăn hơ ioh, tơgŭm djru pơgang vaccine ăn tơdrong jang ƀet bơ̆ng, sơđơ̆ng tơdrong hơtŏ drŏ nglo drŏ kăn.