Kơ iĕng Thủ tướng Lê Thành Long, Kơdră chĕp pơgơ̆r Jơnŭm chĕp pơgơ̆r Tơring Tơmăn đak kroong Cửu Long pơm tơm hop akŏm. Kiơ̆ tơbăt Hơnih tơm Pơpro tơdrong jang păng tơmơ̆t jên jang, sơnăm 2024, tơdrong jang atŏk tơ iung mŭk drăm tơpôl Tơring Tơmăn đak kroong Cửu Long iŏk đei jơnei hơ iă. Tơdrong tŏk muk drăm kơ Tơring jơnei 7,31%, lơ hloh jô̆ hơtŏ lơ̆m teh đak (dang 7%). Lơ tơdrong vă jang, tơdrong jang tơm lơ̆m tơring tơlĕch jang, tơ iung pơjing, pơjing rơvơn ăn tơƀưh dih băl lơ̆m tơring. Mă lei, mŭk drăm-tơpôl lơ̆m tơring oei đei lơ tơdrong tơnap tap, tơdrong jang sa oei iĕ; 12/13 dêh char lơ̆m Tơring oei tim mă pơprŏ pơ ‘lơ̆ng găh tơdrong thuê̆, tơlĕch kon jên jang, trong jang atŏk tơ iung tim mă kơjăp. Tơdrong đak ƀăt ƀoh hram mơ̆t kơtang, pơm ăn truh ưh kơ măh đak sŏ nhă păng jang sa.Iung pơma tơ̆ Hop akom, Kơ iĕng Thủ tướng Lê Thành Long athei rim dêh char kăl hơdrin hloh dơ̆ng jang kiơ̆ tơdrong jang lơ̆m tơring, hơmet pơ ‘lơ̆ng dôm tơdrong long. Hăm dôm tơdrong jang kăl kơ Tơring lơ̆m khei năr kơnh, kăl pơprŏ kon jên jang ăn rim tơdrong jang tơm teh đak, tơdrong vă jang trong nơnăm tơm tơgop pơm atŏk tơ iung mŭk drăm-tơpôl tĕnh koăng, kơjăp ‘lơ̆ng.