Tơ̆ Hop akŏm, tang măt ăn rim hơnih jang tơm, hơnih bơ̆ jang hlôi pơma dơnuh găh tơdrong atŏk tơ iung mŭk drăm-tơpôl, tơdrong tơlĕch jang rim tơdrong jang kơ Jơnŭm chĕp pơgơ̆r tơring Tây Nguyên sơnăm 2024 păng trong tơlĕch jang sơnăm 2025. Adoi athei găh trong vă jang, trong jang tơm păng tơdrong jang hơdăh kăl pơjao ăn rim hơnih tơm, hơnih bơ̆ jang păng rim dêh char tơring Tây Nguyên vă pơgơ̆r tơgoăt jang hơdoi atŏk tơ iung tơring hăm iŏk đei jơnei kơtang hloh; Lơ̆m ou pơma hơdăh rim tơdrong găh atŏk tơ iung ŭnh hơyuh, trong pơprŏ tơmơ̆t jên jang atŏk tơ iung trong nơnăm tơƀưh dih băl lơ̆m tơring, trong pơprŏ jang sir iŏk mŭk drăm lơ̆m teh. Kơ iĕng Thủ tướng Teh đak Nguyễn Hòa Bình athei rim kơdră lơ̆m Jơnŭm chĕp pơgơ̆r tơring Tây Nguyên, rim hơnih tơm, hơnih jang, rim dêh char lơ̆m tơring Tây Nguyên hơnơ̆ng iung jang kơtang hloh dơ̆ng lơ̆m tơlĕch jang kiơ̆ rim tơdrong jang hlôi tơlĕch ăn, mă kăl atŏk kơtang rim tơdrong vă jang pơm trong gre nơnăm tŏk bŏk pơm hiơ̆ hyĭn ưh kơjăh đang; pơrô̆ athei jang kiơ̆ jơnei tơdrong jang mŭk drăm-tơpôl tơklep hăm vei lăng sơđơ̆ng tơring, sơđơ̆ng teh đak lơ̆m tơring Tây Nguyên.