Kơ iĕng Thủ tướng athei hop akŏm chă akŏm hơlen hơdăh trŏ ƀlep hăm tơdrong phe ƀa hrei ou lơ̆m hơnih tĕch mơdro tơ̆ teh đak đe păng lơ̆m teh đak. Atŭm hăm ‘noh pơm hơdăh kơ yuơ kă kiơ mưh truh khei ‘năr kĕch yoă tă đei ƀôh tơdrong ƀa plei ưh kơ lơ kơ jă măt, mưh đei ƀa lơ ‘noh kơjă re tŏk bŏk pơm tơnap tap ăn kon pơlei choh jang sa. ‘Ngoăih kơ ‘noh, kăl dăr lăng kơhret, tơdra hơdrol păng hơmet ming tơdrong tĕch mơdro phe ƀa mă trŏ lăp, kơjăp ‘lơ̆ng. Adoi kăl đei trong jang ‘lơ̆ng đunh đai tai sơnăm, tơplih ăn kơ yuơ trong jang hăt hot vă kĕ vei lăng năng tông tơdrong jang phe ƀa kơ Việt Nam, kĕ vei lăng năng tông kon pơlei hơnơ̆ng tơklep kơjăp hăm tơdrong choh jang sa. Kiơ̆ tơbăt, tơmam drăm phe ƀa tơ̆ teh đak bơ̆n oei vei kơjăp choh jang sa, pơm tơlĕch păng tĕch mơdro tơ̆ teh đak đe sơđơ̆ng; hơdrô̆ sơnăm 2024, tĕch phe tơ̆ teh đak đe kơ Việt nam hloh 9 triu tấn hăm iŏk đei truh 5 ti 750 triu USD. Lơ̆m 2 khei blŭng sơnăm ou, tĕch mơdro phe tơ̆ teh đak đe kơ Việt Nam hlot dang 1 triu 100.000 tân.