Tơdrong ‘nâu sơng đei hlŏh 200 ‘nu hơioh rơgei, dơ̆ng tang ăn hlŏh 467 rơbâu ‘nu hơioh tơ̆ 17 apŭng, thĭ xăh, plt lơ̆m dêh char. Tơ̆ jơ pơma nuh, lơ hŏk tro tơlĕch nơ̆r pơma ƀơm truh tơdrong teh tôn băl tơ̆ hnam trưng, vei sơđơ̆ng lơ̆m mang păng tơdrong krê hơmơt đơ̆ng pơm ngôi kơmlăi. Đe oh hli pơngơ̆t tơ̆ hơnăp tơdrong hơlĕnh pơdăr, pơrăm jơhngâm đon lơ̆m mang kŭm nhen tơdrong răm kơnê̆ đơ̆ng yoa kơmlăi.

‘Ngoăih kơ ‘nŏh, dôm tơdrong kơhret mưh hŏk pơhrăm, ưh đei tôm anih pơm ngôi, tơplŏh kơdâu păng tơdrong ‘mĕh vă đei roi tơƀôh jơhngâm đon tơ̆ hnam trưng kŭm jing dôm tơdrong đei lơ hŏk tro pơngơ̆t truh ‘năi. Dôm tơdrong mă hŏk tro Gia Lai pơma tơlĕch hlôi đei dôm anih jang kơpal tơ̆ dêh char mơ̆ng, chih răk păng gô đei nơ̆r tơl tơblang mă hơdăh. Ƀok Rah Lan Chung- Kơdră vei lăng kon pơlei dêh char Gia Lai pơma hơdăh, vă pơjing lơ tơdrong lăp ‘lơ̆ng, athei dôm anih jang kơpal đei trong jang mă rơđăh, pơm lăp hăm tơdrong ‘mĕh vă đơ̆ng hŏk tro.