Hmach ăn kơ ƀok Huỳnh Thành Đạt iŏk jang kơchư̆k ‘nao, Kơdră chĕp pơgơ̆r Hơnih jang Ban Tuyên giáo păng Dân vận Trung ương Nguyễn Trọng Nghĩa akhan, ‘nou jing mĭnh jơhngơ̆m pran ‘nao vă Ban Tuyên giáo păng Dân vận Trung ương hơnơ̆ng jang keh đang hơnăp jang đei Đảng, Teh đak păng kon pơlei pơjao. Ƀok Huỳnh Thành Đạt tih vơ̆ djơ̆ ‘lơ̆ng tơ̆ Bến Tre, đei hŏk pơhrăm tôm tong, iŏk jang lơ kơchư̆k. Hăm kơchư̆k jang Kơdră chĕp pơgơ̆r Hơnih tơm Khoa hŏk păng Kmăi kmŏk, ƀok Huỳnh Thành Đạt hlôi tơgop, hơnhăk tơdrong jang khoa hŏk păng kmăi kmŏk đei hơyak pran kơtang. Khoa hŏk păng kmăi kmŏk ‘noh mĭnh lơ̆m tơdrong jang atŏk kơtang, pơtrŭt tơplih ‘nao tơchăr, jing hơyak kăl vă teh đak mơ̆t lơ̆m chăl ‘nao, chăl atŏk tơ iung kơ hơdrĕch hơdrung. Kơ yuơ lơ loh hơnăp jang, sơnong jang kơ Ban Tuyên giáo păng Dân vận Trung ương jei kăl atŏk kơtang tơplih ‘nao kơsô̆ lơ̆m bơ̆ jang pơchoh ăn jơhngơ̆m đon, tơbăt hơdăh trong bơ̆ jang teh đak truh hăm rim kang ƀô̆, đang viên păng kon pơlei.