Đơ̆ng rŏng 6 năr 1 poăt, ‘Măng hop akŏm hăt hot mă 9, Kuôk hô̆i jăl 15 hlôi keh đang dôm tơdrong jang đei tơlĕch ăn. Iung pơma pơtôch hop akom, Kơdră chĕp pơgơ̆r Kuô̆k hô̆i Trần Thanh Mẫn sơkơ̆t hơdăh: dôm tơdrong tơchơ̆t hlôi đei Kuô̆k hô̆i pơdrơ̆ng kiơ̆ ‘noh tơtom, tơpăt, trŏ lăp, lăng kăl, trong jang trŏ lăp kăl hloh kơ Đảng, Teh đak. ‘Măng hop akŏm ou, Kuô̆k hô̆u hlôi lăng hơlen, pơdrơ̆ng kiơ̆ 4 khôi luơ̆t, pơdrơ̆ng kiơ̆ Tơdrong tơchơ̆t găh hơmet ming mĭnh ƀar tơdrong đei ƀơm truh hơmet ming hơnih jang khul jang teh đak păng 4 tơdrong tơchơ̆t vă jang kiơ̆ hơmet ming hơnih jang, bơngai jang kơ Kuô̆k hô̆i, Khul kơdră Teh đak; pơdrơ̆ng kiơ̆ 6 Tơdrong tơchơ̆t vă pơtrŭt kơtang atŏk tơ iung mŭk drăm-tơpôl kơ teh đak păng rim trong jang, trong tơgum djru kăl hăm mĭnh ƀar tơdrong vă jang, hơnih jang kăl teh đak. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, ‘nou jĭ hơyak kăl hloh lơ̆m tơ iung pơjing khôi luơ̆t, jĭ trong jang kăl hloh tơgŭm ăn bơ̆ jang gơh hơgei hơmet ming, pơm kơtoei hơnih jang khul jang kơ khul chinh trĭ păng tơtom hơmet pơ ‘lơ̆ng tơnap tap, tơhlăk tơhlĭn găh trong tơlĕch jang, tơdrong tơchơ̆t, pơjing hơyak pran vă pơm pơkeh trong hnam, pơjing đei hơyak atok tơ iung ‘nao ăn tơring păng lơ̆m teh đak.