Pơgê brei (28/3), tơ̆ Hơnih bơ̆ jang Kơdră chĕp pơgơ̆r Teh đak, Kơdră chĕp pơgơ̆r Teh đak Lương Cường hlôi pơm tơm pơm lêh sơng Ƀok kơdră tơm Brasil Luiz Inácio Lula da Silva năm tơmang Việt Nam. Lăp đơ̆ng rŏng pơm lêh sơng, Kơdră chĕp pơgơ̆r Teh đak Lương Cường hlôi pơma đam hăm Ƀok kơdră tơm Lula da Silva. Tơ̆ ‘măng pơma đam, Kơdră chĕp pơgơ̆r teh đak Lương Cường pơma hơdăh ‘măng năm tơmang ‘măng mă ou sơkơ̆t hơdăh Brazil lăng kơjăp păng ‘meh vă atŏk kơtang tơgoăt tơgoăl Jang hơdoi gĭt kăl hăm Việt Nam lơ̆m trong bơ̆ jang tơgoăt tơgoăl hăm ASEAN păng châu Á-Thái Bình Dương. Ƀar păh kơdră pơma dơnuh, drơ̆ng mĭnh nơ̆r rim trong jang vă hơnơ̆ng atŏk tơ iung tơgoăt tơgoăl Jang hơdoi gĭt kăl Việt Nam-Brasil roi năr roi ‘lơ̆ng hơ iă păng jơnei, adoi nhen pơma dơnuh găh dôm tơdrong lơ̆m tơring păng apŭng plĕnh teh mă ƀar păh lăng truh. Hơlen găh trong lăng atŏk tơ iung teh đak, tơgŭm djru dôm trong jang kăl lơ pang, jang hơdoi vang atŏk tơ iung păng atŏk hơnăp jang kơ rim teh đak tŏk bŏk atŏk tơ iung tơ̆ rim trong bơ̆ jang chĕp pơgơ̆r lơ̆m plei teh, ƀar ‘nu kơdră chĕp pơgơ̆r drơ̆ng mĭnh nơ̆r iung jang hơdoi păng tơgŭm djru dih băl tơ̆ rim hơnih jang apŭng plĕnh teh, hop akom lơ pang.