Kơsơ̆ năr 28/4, tơ̆ dêh char Hà Tĩnh, Kơdră chĕp pơgơ̆r Teh đak Lương Cường hlôi sơng pơmna dơnuh hăm Tổng Bí thư, Kơdră chĕp pơgơ̆r Teh đak Lào Thoong-lun Xi-xu-lít ƀlep lơ̆m năr ƀok năm tơmang Việt Nam vang năm Pơm lêh et hơtŏk dơnŏk kơsô̆ 3 - Dơnŏk duk Vũng Áng - mĭnh lơ̆m dôm hơnih jang ming man gĭt kăl tơgoăt mŭk drăm ƀar păh kơ ƀar teh đak păng vang năm Pơm lêh tơbăt 50 sơnăm năr Rơngei tơring Pơbăh, Teh đak rơngei keh kong. Tơ̆ jơ sơng, Kơdră chĕp pơgơ̆r Teh đak, hmach bơnê păng hôn bơnê kơtang dôm tơdrong jơnei kơ teh đak Lào iŏk đei lơ̆m khei năr ou ki păng pơma tơbăt jơhngơ̆m đon lui akhan, hăm trong chĕp pơgơ̆r, pơrô̆ jang đơ̆ng Đảng Kon pơlei Kĕch mang Lào, chĕp kơ̆l ‘noh ƀok Thoong-lun Xi-xu-lít, teh đak Lào gô hơnơ̆ng iŏk đei jơnei tih tên ‘nao hloh dơ̆ng, jang kiơ̆ jơnei Tơdrong tơchơ̆t Hop akom tih ‘măng mă XI, pơgơ̆r jơnei Hop akŏm tih Đảng Kon pơlei Kĕch mang Lào ‘măng mă XII. Găh tơdrong et hơtŏk păng tơmơ̆t yoa dơnŏk kơsô̆ 3, Dơnŏk duk Vũng Áng, Kơdră chĕp pơgơ̆r Teh đak Lương Cường lui akhan, dơnŏk kơsô̆ 3, Dơnŏk duk Vũng Áng gô sơđơ̆ng ăn tơdrong ‘meh vă tăh chơ pơdŭ tơmam drăm roi năr roi lơ kơ ƀar teh đak, tơgŭm ‘lơ̆ng ăn chơ choĕn dih băl tơmam drăm mơdro sa hăm teh đak boăl Lào, đơ̆ng noh tơgop lơ̆m tơdrong atŏk tơ iung păng vang mơ̆t hơdoi jang mŭk drăm kơ ƀar teh đak.