Lêh tơbăt kơyuơ Anih jang Tơroi tơbăt păng Pơrô̆ pơrôp Trung ương, Anih tơm jang Pơgang hơmet jĭ jăn pơgơ̆r kăp gĭt. Tang măt ăn kơdră Đảng, Teh đak, Kơdră Kuôk hô̆i Trần Thanh Mẫn hmach bơnê kơ dôm tơdrong plang, hơdrin đơ̆ng đe thâi pơgang păng anih jang pơgang hơmet jĭ jăn hlôi jang đei lơ̆m khei năr ou ki. Kơdră Kuôk hô̆i Trần Thanh Mẫn sơkơ̆t hơdah, Đảng, Teh đak bơ̆n hơnơ̆ng vei lăng păng hơtŏk pơ-'lơ̆ng jơhngơ̆m jăn ăn Kon pơlei jĭ minh lơ̆m dôm sơnong jang kăp gĭt hloh; hlôi păng tŏk bŏk jang tôm tơdrong, tơtom, pơtrŭt anih jang Pơgang hơmet jĭ jăn hơtŏk pran hloh lơ̆m jăl 'nao.

Kơdră Kuôk hô̆i lui ngeh, khul thâi pơgang, kang ƀô̆, bơngai jang tơ̆ anih jang pơgang hơmet jĭ jăn pơtoi tơguăt dih băl, jang kiơ̆ lơ trong jang hơgei, vă gơh tơnăp hloh dơ̆ng; hơnơ̆ng tơgăl hăm hơnăn “Thâi pơgang thoi lĕ mĕ dim”, pơjing đei “Ƀai hơri hơ-'nguơ̆u kơ linh ao kok” mă Kon pơlei hơnơ̆ng gơnơm hơpơi 'meh.