Tơ̆ jơ pơm jang, Kơdră Kuôk hô̆i bơnê kơ khul kŏng an yuk hơlâu lơ̆m tơdrong pơkăp jơnŭm pơgơ̆r jang, vei sơđơ̆ng pran, bot, pơm jang tơnăp. Trong pơm jang âu đei rim tơring, rim anih jang nai jang kiơ̆. Sơnăm 2025 đei lơ năr lêh tih kơ teh đak, mă kăl noh 80 sơnăm năr tơ-iung pơjing teh đak adoi jing 80 sơnăm tơ-iung pơjing khul kŏng an kon pơlei, Kơdră Kuôk hô̆i Trần Thanh Mẫn hơpơi 'meh kŏng an keh đang tơnăp sơnong jang sơnăm 2025 tơgop lơ̆m tơdrong jang tơ-iung pơjing păng vei lăng teh đak păng vang jang atŭm hăm Kuôk hô̆i lơ̆m tơdrong chih akŏm khôi luơ̆t, jang hơlen.

Kơdră Kuôk hô̆i Trần Thanh Mẫn pơgơ̆r khul kŏng an pơm kiơ̆ dôm luơ̆t hlôi đei Kuôk hô̆i hơlen lơ̆m dôm 'măng hop akŏm kơ Kuôk hô̆i, lơ̆m noh hơtŏk kơtang tơdrong tơroi tơbăt ăn kon pơlei hlôh vao păng pơm kiơ̆ trŏ khôi luơ̆t teh đak. Ƀô̆ trưởng Anih tơm Kŏng an Lương Tam Quang sơkơ̆t hơdah, iŏk yua tơdrong đei jơnei lơ̆m tơdrong pơkăp bot 'lơ̆ng jơnŭm pơgơ̆r, anih jang kŏng an tŏk bŏk kơchăng vă pơm kiơ̆ tơdrong pơkăp âu đơ̆ng trung ương truh tơ̆ tơring.