Lơ̆m ‘măng năm ngôi păng bơ̆ jang tơ̆ dêh char Hà Tĩnh, kơsơ̆ 27.12, Kơdră Quốc hội Trần Thanh Mẫn bơ̆ jang Khul kơdră chĕp kơ̆l Đảng dêh char Hà Tĩnh găh tơdrong jang kiơ̆ Tơdrong tơchơ̆t đơ̆ng Hop akŏm Đảng lơ̆m teh đak ‘măng mă XIII, Tơdrong tơchơ̆t đơ̆ng Hop akŏm Đảng ƀô̆ dêh char ‘măng mă XIX, jăl jang 2020 – 2025 păng tơlĕch jang kiơ̆ tơdrong tơchơ̆t đơ̆ng Anih chĕp kơ̆l pơgơ̆r Quốc hội găh hơmet ming anih jang vei lăng tơ̆ apŭng, xăh lơ̆m dêh char đơ̆ng 2023 - 2025. 

Đơ̆ng rŏng kơ mơ̆ng kơdră chĕp kơ̆l dêh char Hà Tĩnh tơroi, dôm bơngai lơ̆m Khul jang tơƀôh đon hơiă hăm tơdrong jang tŏk mŭk drăm (GRDP) kơ Hà Tĩnh iŏk đei truh 7,48%, thu mong jên lơ̆m dêh char đei 9.600 ti, lơ̆m đĭ đăng kơsô̆ jên thu mong lơ̆m sơnăm vă jê̆ 18 rơbâu ti. Hà Tĩnh jĭ dêh char năm hơdrol lơ̆m tơdrong pơjing tơring tơrang ‘nao. Dôm bơngai lơ̆m Khul jang oei hơpơi ‘mĕh Hà Tĩnh hơnơ̆ng hơmet pơ ‘lơ̆ng dôm tơdrong tơhlăk, pơih trong vă jang tŏk pran hlŏh dơ̆ng, adrin jang tŏk đei 2 kơsô̆. Kơdră Quốc hội Trần Thanh Mẫn akhan, hăm dôm tơdrong ‘lơ̆ng đơ̆ng Hà Tĩnh tơdăh đei iŏk yoa ‘lơ̆ng ‘nŏh gô jang tŏk pran hlŏh dơ̆ng, ưh lăp dơ̆ng nhen dang ei đĕch. Ƀlep ƀât vă sơng sơnăm ‘nao Ất Tỵ, kơsơ̆ 27/12, tơ̆ apŭng Thạch Hà, dêh char Hà Tĩnh, Kơdră Quốc hội Trần Thanh Mẫn năm ngôi, hơpăh tơmam ăn unh hnam đei kŏng, unh hnam pơmat tat tơ̆ dôm apŭng Hương Sơn, Thạch Hà păng plt Hà Tĩnh.