Kơdră Quốc hội Trần Thanh Mẫn năm ngôi, hơpăh tơmam ăn dôm unh hnam đei kŏng, bơngai đei tơdrong arih xa pơmat tat tơ̆ dêh char Hậu Giang ƀlep ƀât vă sơng Tết Ất Tỵ 2025. 350 tơpu tơmam Tết đei Kơdră Quốc hội Trần Thanh Mẫn păng khul jang pơjao ăn dôm unh hnam đei kŏng, công nhân, bơngai jang păng bơngai kon kông tơ̆ apŭng Châu Thành A păng Phụng Hiệp, tơƀôh hơdăh đon tơtăm, pơngơ̆t đơ̆ng Đảng, teh đak hăm dôm bơngai đei tơdrong arih xa pơmat tat, mă loi ƀât Tết truh.

Kơdră Quốc hội chih răk, pôk pơ ư dôm tơring lơ̆m dêh char hlôi jang ‘lơ̆ng tơdrong vei lăng tơdrong arih xa tơpôl, lơ̆m noh apŭng Châu Thành A, mă đơ̆ng oei đei lơ pơmat tat mă lei hlôi krao hơvơn man đei 185 tŏ hnam ăn bơngai pơmat tat, hơmet vă jê̆ 2.500 tơpu tơmam Têt ăn dôm bơngai pơmat tat, akŏm đĭ đăng đei kơjă hlŏh 1,5 ti hlak jên.