Pơma tơ̆ jơ pơma đam, Kơdră Quốc hội hơpơi ‘mĕh 2 păh pơih xă tơdrong jang hơdoi găh unh hơyuh păng kơmăy rơgŏh. Việt Nam oei hơtŏk tơdrong tơplih unh hơyuh, tưk tơiung unh hơyuh rơgoh. Uzbekinstan, hăm lơ tơmam drăm kơchơ̆t sŏh đơ̆ng bri brăh păng đei lơ tơdrong ‘lơ̆ng vă pơm tơlĕch unh hơyuh rơgŏh, gơ̆h jing teh đak jang hơdoi gĭt kăl lơ̆m tơdrong roi tơƀôh trong juăt jang, kơmăy kơmŏk păng tơmât jên jang ăn dôm tơdrong jang unh hơyuh kơjăp ‘lơ̆ng.

Khul bơngai tĕch mơdro kơ 2 teh đak athei kơchăng chă hơlen năng, roi tơƀôh tơdrong kăl vă đei trong jang hơdoi vang tơmât jên jang đei yoa ‘lơ̆ng, atŭm hăm ‘nŏh vang tơgŭm iŏk yoa tơdrong tĕch mơdro xa tơ̆ băl vang pơih xă tơdrong tĕch mơdro xa tơ̆ tơring ASEAN păng tơring Trung Á hăm lơ tơdrong ‘lơ̆ng.