Kơdră teh đak bơ̆n ƀok Lương Cường truh pơm lêh. Hưch hanh păng čhôk ‘nă mưh chă pơđou dơ̆ng dôm sơnăm tơblăh vang kơtang nuih mơng, tôch pơmat tat mă lei iŏk đei lơ tơdrong jơnei ‘lơ̆ng hơiă, Kơdră teh đak bơ̆n pơma hơdăh ‘nâu kŭm jing jơnăr vă năng dơ̆ng jăl trong jang tŏk tôch pran đơ̆ng Bình Phước – groi teh kơtang nuih mơng, mĭnh jơhngâm đon ưh đei tơplih, đei ƀĕnh tơdrong juăt jang kăch mang păng oei jang tŏk tôch pran.

Kơdră teh đak pơma hơdăh, Bình Phước ưh lăp jang tŏk jing anih ang hơdăh lơ̆m tơdrong jang mŭk drăm, tơpôl đech mă oei tơƀôh hơdăh ăn đon adrin, hơpơi ‘mĕh jang tŏk ưh kơ pơdơ̆h đơ̆ng 1 groi teh adrol sơ̆ pŭ lơ tơdrong răm đơ̆ng tơblăh vang. Kơdră teh đak pơma hơdăh, dôm kơjă kăp gĭt đơ̆ng tơdrong rơngei, pơjing đei 1 teh đak păng jang tŏk hrei ‘nâu đei pơjing hăm lơ tơdrong adrin, plang jơhngâm, chu lôch hŭt hơkâu tih tên đơ̆ng chăl adrol sơ̆. Kiơ̆ Kơdră teh đak ‘nâu jĭ 1 tơdrong adrin vă rim bơngai kon hơ ‘lơ̆p Bình Phước hơnơ̆ng yak tŏk, adrin choh jang xa, gơ̆h hơgei, vang pơjing 1 Bình Phước hơnŭk hơnoa, ‘lơ̆ng rŏ, tơgăl hăm tơdrong juăt kơtang nuih mơng mă rim jơhnơr adrol sơ̆ hlôi hŭt jơhngâm tơiung pơjing.