Đơ̆ng rŏng kơ pơjao tơdrong tơchơ̆t, Kơdră teh đak Lương Cường hlôi pơjao hla ar Pơm bơngai tang măt ăn teh đak CHXHCN Việt Nam ăn Phŏ Kơdră tơm jang tơbôl Nguyễn Minh Hằng; Phŏ Kơdră tơm jang tơbôl Phạm Thanh Bình; Bơngai tang măt gĭt kăl ăn teh đak CHXHCN Việt Nam tơ̆ Ấn Độ Nguyễn Thanh Hải; Phŏ Kơdră, Phŏ Chánh Văn phòng Anih tơm jang tơbôl Ngô Toàn Thắng; păng ƀok thây pơtho gĭt kăl tơ̆ Hnam hŏk jang tơbôl Nguyễn Vũ Tùng.

Tơ̆ jơ pơm lêh, Kơdră teh đak Lương Cường hơiă hăm dôm bơngai tang măt ‘nao iŏk đei tơdrong tơchơ̆t pôk hơtŏk Pơm bơngai tang măt âu. Kơdră teh đak hơpơi ‘mĕh dôm Bơngai tang măt hơnơ̆ng bơ̆jang mă tơnăp, vang tơgop ‘lơ̆ng ăn tơdrong jang tơbôl atŭm lơ̆m sơnăm 2025 kŭm nheh dôm sơnăm đơ̆ng rŏng, hơnơ̆ng tơgop hơmet kơjăp tơdrong jang tơbôl ‘lơ̆ng hơiă, pơm hơtŏk anih dơ̆ng ăn Việt Nam lơ̆m chăl ‘nao, hơtŏk tơdrong đei yoa ăn teh đak – hơdrĕch hơdrung, pơm lăp hăm tơdrong jang pơjing păng vei lăng teh đak.