Đơ̆ng rŏng mơ̆ng tơroi tơbăt păng dôm nơ̆r tơgop pơma dơnuh, Kơdră teh đak Lương Cường tơƀôh rơđăh, hăm tơdrong chĕp kơ̆l đơ̆ng Đảng, dôm sơnăm âu ki, tơdong tư pháp teh đak bơ̆n hlôi đei dôm hơyak hơtŏk tơiung ‘lơ̆ng, iŏk đei jơnei gĭt kăl lơ̆m rim tơdrong; pơgơ̆r, bơ̆jang dôm anih jang tư pháp ưh kơ đei pơdơh đei tơplih, jang đang, jơnei, đei yua hloh. Kiơ̆ đơ̆ng noh, tơ̆ hơnăp kơnh, tơdrong jang hơmet ming tư pháp hơnơ̆ng bơ̆ jang kiơ̆ tơdrong tơchơ̆t kơsô̆ 27-NQ/TW găh pơjing Teh đak chĕp kơ̆l pơgơ̆r kiơ̆ xã hội chủ nghĩa Việt Nam lơ̆m jăl jang ‘nao; hơdrin pơjing tư pháp hơgei, ‘nao, hơtŏ băl, tơpăt, pơvih pơvăn ăn Teh đak, pơvih pơvăn kon pơlei.

Găh tơdrong jang hơmet ming ăn ‘Măng hop akŏm mă mônh sơnăm 2025 kơ Khŭl pơgơ̆r jang Hơmet ming tư pháp Trung ương, Kơdră teh đak pơma hơdăh, tơdrong jang hơmet ming tư pháp athei jang kiơ̆ trong tơ jur jang, trong jang đơ̆ng Đảng, vei sơđơ̆ng hrơ̆ch 1 ‘măng, drơ̆ng 1 nơ̆r đơ̆ng dôm trong jang tơgŭm khôi luơ̆t, tơgop hơtŏk ‘lơ̆ng đei yua tơdrong jang tư pháp, pơjing Teh đak chĕp kơ̆l pơgơ̆r kiơ̆ xã hội chủ nghĩa.