Lăng truh tơdrong pơgơ̆r hop akŏm kăl kơ lăng kăl pơgơ̆r pơma dơnuh mă hơlen, ‘lơ̆ng, vang tơgop hơdăh đei yua hla ar chih ming dôm hla ar kăl, tơroi tơbăt chĭnh trĭ athei hơlen lăng ƀlep tơdrong jang kiơ̆ tơdrong tơchơ̆t hop akŏm jăl jang hơdrol, mă loi ‘noh jĭ dôm hơnăp jang tơm, hơnăp jang pơjing, hơmet ming Đảng.

Hăm hơnăp jang pơtôch Tơdrong tơchơ̆t 18, Kơdră teh đak athei khŭl bơ̆jang ‘nao kăl kơ bơ̆jang ‘lơ̆ng hloh, đei yua hloh, pơm lăp ‘lơ̆ng hloh athei, tơdrong jang, hơnăp jang đơ̆ng Anih pơvih ăn Kơdră teh đak. Tơdrong jang bơ̆jang kiơ̆ proh hơmet, pơm tŏ sĕt bơngai jang kăl kơ lăng bơngơ̆t truh jơhngơ̆m đon tơchĕng, ‘meh vă, vei lăng tơdrong hơrih sa kơ kang ƀô̆, bơngai jang kơ anih jang sơđơ̆ng jơhngơ̆m, hơdrin jang đang ‘lơ̆ng hloh hơnăp jang đei pơjao.