Hơdrol kơ Tết Nguyên đán Ất Tỵ 2025 păng kơkuh chơt hơiă tơbăt 95 sơnăm năr pơjing Đảng Cộng sản Việt Nam (3/2/1930-3/2/2025), kơsơ̆ 14/1, Kơdră teh đak Lương Cường păng khŭl bơ̆jang Trung ương hlôi năm ngôi păng hmach thơ thou Têt kơ dôm kơdră chĕp kơ̆l teh đak hơdrol sơ̆ ƀok Trương Tấn Sang păng ƀok Nguyễn Minh Triết. Kơdră teh đak Lương Cường tơƀôh jơhngơ̆m đon bơnê kơ dôm tơdrong tơgop đơ̆ng 2 kơdră chĕp kơ̆l teh đak hơdrol sơ̆ hăm tơdrong jang kach mang kơ Đảng, hơtŏk ‘lơ̆ng anih dơ̆ng, bưng ai teh đak păng hơmet ming grŭp tơgoăt pôm nơ̆r ƀơ̆r đon đĭ đăng hơdrĕch hơdrŭng. Ƀlep ƀơ̆t sơnăm ‘nao Ất Tỵ 2025 vă jê̆ truh, Kơdră teh đak hlôi pơjao tơmam Têt asong ăn kơ bre ƀok kơdră teh đak hơdrol sơ̆ Trương Tấn Sang păng Nguyễn Minh Triết, hmach thơ thou kơ bre ƀok kŭm hăm ŭnh hnam sơnăm ‘nao pran jăng grăng hơkâu, hiôk chơt, jơnei, sơng Puih mak Ất Tỵ chơt hơiă.

Kơdră teh đak hơdrol sơ̆ ƀok Nguyễn Minh Triết păng ƀok Trương Tấn Sang tơƀôh đon ƀrơ̆k jơhngơ̆m tơ̆ hơnăp tơdrong ‘mêm păng tơdrong bơngơ̆t truh đơ̆ng rim kơdră chĕp kơ̆l Đảng, teh đak pơma atŭm păng kơdih Kơdră teh đak Lương Cường pơma hơdrô̆; hơdai hăm lui ngeh akhan teh đak bơ̆n gô yak mơ̆t lơ̆m sơnăm 2025 kơjăp hăm tơdrong chĕp kơ̆l đơ̆ng Đảng, iŏk đei lơ jơnei pran kơtang hloh dơ̆ng, pơm tơdrong tŏk pran lơ̆m tơdrong jang pơjing păng hơtŏk tơiung teh đak.