Kơdră teh đak pơma hơdăh Việt Nam ling lang lăng ASEAN ‘noh tơgŭm hơdrol gĭt kăl lơ̆m tơdrong jang tơgŭm tơbôl păng ling lang hơdrin đĭ jơhngơ̆m kŭm hăm dôm teh đak ASEAN pơjing Tơpôl ASEAN tơgoăt pôm nơ̆r ƀơ̆r đon, pran kơjăp, đei hơnăp jang, anih dơ̆ng roi ‘năr roi kơ jung lơ̆m apŭng plĕnh teh.

Kơdră teh đak pơma hơdăh Việt Nam tơgŭm Malaysia iŏk jang jơnei hơnăp jang Kơdră ASEAN sơnăm 2025 păng thơ thŏu kơ Malaysia hơnơ̆ng chông ba ASEAN iŏk đei dôm jơnei tih tên, yak truh 1 ASEAN “Kơjăp păng ‘lơ̆ng” kiơ̆ ƀlep trong jang đơ̆ng ASEAN. Kơdră teh đak pơma hơdăh, lơ̆m khei ‘năr tơblăh tơblŭng, kơhret, đei ƀôh krê hơmơt tơ̆ lơ tơring, dôm teh đak jang lơ̆m ASEAN kăl kơ hơnơ̆ng tơgŭm băl pơvei cham char rơngei pơyua ăn hơtŏk tơiung; hơtŏk loi dơ̆ng tơgoăt pôm nơ̆r ƀơ̆r đon kơjăp hloh dơ̆ng đơ̆ng dôm teh đak.