Tơ̆ jơ sơng, 2 kơdră chĕp kơ̆l pơma hơdăh, dôm ‘măng pơma dơnuh, tơƀơ̆p pơgơ̆r hơnơ̆ng tơ̆ rim kơdră, mă loi ‘noh jĭ kơdră kơpal tơƀôh tơdrong lui ngeh chĭnh trĭ đơ̆ng 2 teh đak, jing tơdrong ‘lơ̆ng vă pơtrŭt jang hơdai lơ̆m rim tơdrong jang nai; akhan 2 păh kăl kơ hơnơ̆ng hơdrin vă pơvei păng tŭn pran tơdrong jang tŏk hrĕnh đơ̆ng mơdro sa 2 pang, hơdai hăm tơgĕch iŏk yua tôch ai dôm tơmam ‘lơ̆ng, pran păng hlôh vao jang hơdai đơ̆ng 2 teh đak lơ̆m 75 sơnăm âu ki vă hơnhăk tơdrong pơvei lơ̆m rim tơdrong jang nai yak mơ̆t lơ̆m jrŭ să, tơpă, jơnei, vang đei yua.

2 kơdră chĕp kơ̆l drơ̆ng 1 nơ̆r tơ̆ hơnăp kơnh gô hơdrin pơtrŭt jang hơdai joh ayŏ, tơƀơ̆p đơ̆ng kon pơlei, mă loi ‘noh jĭ đơ̆ng jơhnơr mơlôh 2 teh đak vă hơtŏk loi dơ̆ng hlôh băt dih băl.