Tang măt ăn kơdră chĕp kơ̆l Đảng păng teh đak, Kơdră teh đak Lương Cường pơtruh nơ̆r ‘lơ̆ng hơiă hăm kon pơlei oei xa tơ̆ teh đak đe, đei nơ̆r jet gia pơma nuh păng pơtruh nơ̆r thơ thou ‘lơ̆ng hơiă hlŏh lơ̆m sơnăm ‘nao. Kơdră teh đak ăn tơbăt, Đảng, teh đak păng kon pơlei lơ̆m teh đak hơnơ̆ng hue lăng truh tơdrong arih xa kơ kon pơlei tơ̆ teh đak đe păng tôch hơiă, hưch hanh yoa dôm sơnăm âu ki, mă tơjră hăm lơ tơdrong pơmat tat, pơlong nol mă lei kon pơlei bơ̆n oei vei kơjăp jơhngâm đon, khŏm jang tŏk pơjing tơdrong arih xa hiôk sơđơ̆ng, ‘lơ̆ng hơiă ƀiơ̆.

Kơdră teh đak tơroi, Việt Nam oei hơmet rim tơdrong kơjăp ‘lơ̆ng vă teh đak bơ̆n hơđơ̆ng jơhngâm yak tŏk lơ̆m chăl ‘nao păng hăm jơhnơr arih pran kơtang đơ̆ng rơbâu sơnăm tơiung pơjing păng vei lăng teh đak, Việt Nam athei tơgĕch iŏk mă ‘lơ̆ng rim tơdrong ‘lơ̆ng hơiă ‘nŏh. Kơdră teh đak hơpơi ‘mĕh rim răih kon pơlei Việt Nam, mă đơ̆ng oei xa lơ̆m teh đak dăh mă tơ̆ teh đak đe, athei vang tơgop jơhngâm ăn tơdrong jang tŏk kơ hơdrĕch hơdrung. Kơdră teh đak pơma hơdăh, Đảng păng teh đak bơ̆n hơnơ̆ng ‘măn tơdrong tơrek, pơngơ̆t truh kon pơlei bơ̆n oei xa tơ̆ teh đak đe.