Pơjao Mê đai Hồ Chí Minh ăn kơ khŭl lĭnh Kon pơlei chă vei lăng kơdih păng pơma tơ̆ jơ pơm lêh, tang măt kơdră Đảng, Teh đak, Kơdră teh đak Lương Cường tơroi rơđăh, Đảng păng teh đak bơ̆n đĭ jơhngơ̆m lăng kăl păng jang kiơ̆ kơjăp trong jang pơjing tơdrong đĭ đăng kon pơlei vei lăng sơđơ̆ng kơjăp teh đak.

Kơdră teh đak Lương Cương athei rim kơdră, rim anih jang đơ̆ng Trung ương truh tơring; Quân ủy Trung ương, Anih tơm vei lăng Khŭl lĭnh hơnơ̆ng bơngơ̆t truh tơmơ̆t jên jang păng vei sơđơ̆ng tơdrong hiôk ‘lơ̆ng hloh ăn khŭl lĭnh Kon pơlei chă vei lăng kơ dih bơ̆jang đei yua hloh dơ̆ng, tơgop kŭm hăm Đảng, đĭ đăng kon pơlei, đĭ đăng lĭnh hơnhăk teh đak kơjăp yak mơ̆t lơ̆m chăl ‘nao - chăl hơtŏk tơiung pơdrŏng pran, hơnŭk hơnoa kơ hơdrĕch hơdrŭng.