Tơ̆ hnam pơgang xăh Tu Mơ Rông, apŭng Tu Mơ Rông, dêh char Kon Tum, bơngai jĭ yơ truh tơ̆ âu kŭm ‘meh đei Y Hà khăm hơlen. Mŏ Y Hà tơblang, 26 sơnăm bơ̆jang tơ̆ Hnam pơgang xăh Đăk Hà, đang kơ ‘nŏh Hnam pơgang xăh Tu Mơ Rông, apŭng Tu Mơ Rông inh tôch juăt hăm rim bơngai jĭ, inh jĭ bơngai Xơ Đăng rơnĕh, arih truh ‘lŏ tơ̆ tơring teh âu dơ̆ng, kon pơlei tơ̆ 2 xăh, tơtă bơngai Xơ Đăng ngăl kơna băt nơ̆r pơma, tơdrong juăt mưh pơma xa kŭm hiôk ƀiơ̆. Chă hơlen năng đơ̆ng khul kơdră tơring, kon pơlei păng dôm bơngai jang tơ̆ Hnam pơgang xăh đei băt, tơdrong tơgop tih hlŏh đơ̆ng Kơdră vei lăng Hnam pơgang xăh Y Hà lơ̆m 26 sơnăm bơ̆ jang ‘nŏh jĭ hlôi chông ba đei lơ drŏkăn bơngai Xơ Đăng năm rơnĕh kon tơ̆ hnam pơgang, dar dĕh hut lê̆ tơdrong juăt rơnĕh kon kơdih tơ̆ hnam.

Hăm mŏ Y Hà, tơdrong hơiă dêh hlŏh jĭ đei ƀôh tơdrong vei lăng jơhngâm pran ăn kon pơlei Xơ Đăng roi đunh roi ‘lơ̆ng: “Adrol sơ̆ tơdrong jĭ jăn đei ƀôh tôch krê hơmơt, lơ bơngai jĭ mă lei hrei ‘nâu tơdrong vei lăng jơhngâm pran hlôi truh hăm rim unh hnam, truh hăm rim pơlei. Nhôn tơ̆ âu ưh pă đei jĭ pơlŏ sôt ret bơih, jĭ pơlŏ lĕch đe, jĭ chŭ lăp pă tŏ sĕt đĕch mă lei ưh pă đei tơpoh bơih. Tơdrong jang tang găn jĭ đei yoa tôch ‘lơ̆ng. Hơpơi ‘mĕh kon pơlei tơ̆ tơring roi băt vei lăng jơhngâm pran ăn kơdih kâu”.

Lơ̆m 26 sơnăm bơ̆jang pơgang tơ̆ tơring pơmat tat Tu Mơ Rông, hăm bơngai jĭ ‘nŏh jĭ bơngai Xơ Đăng, mŏ Y Hà hlôi yak hlŏh lơ tơdrong pơmat tat vă druh kiơ̆ tơdrong hŏk pơhrăm păng jing bơngai đei kon pơlei gơnang yoa, tơgŭm ăn kon pơlei tơ̆ tơring sơlam vei lăng jơhngâm pran roi ‘lơ̆ng ƀiơ̆. Jang răh, hŏk rah, sơnăm 2017 mŏ hŏk đang lăm Cử nhân điều dưỡng găh rơnĕh kon hơ ‘lơ̆p. Hăm hơnăp jang pơm Kơdră vei lăng Hnam pơgang xăh Tu Mơ Rông, kŭm hăm vei lăng tơdrong bơ̆ jang tơ̆ hnam pơgang, mŏ Y Hà oei hơnơ̆ng năm truh tơ̆ 8 pơlei lơ̆m xăh vă hơlen năng, băt hơdăh tơdrong jĭ jăn, tơƀâp, roi tơƀôh ăn kon pơlei trong vei lăng jơhngâm pran. Lơ̆m khei ‘năr bơ̆jang, mŏ kŭm hăm ƀak si, bơngai jang lơ̆m hnam pơgang lơ ‘măng dŏng arih ăn bơngai mĕ păng nge.

Jơhngâm đon jang tơnăp hăm tơring pơmat tat păng bơngai Xơ Đăng jĭ jăn đơ̆ng mŏ Y Hà đei bôl boăl jang hơdoi tơchĕng ‘lơ̆ng. Mŏ Phan Thị Thanh Vân, bơngai jang tơ̆ Hnam pơgang xăh Đăk Hà ăn tơbăt: “Mŏ Y Hà jĭ 1 ‘nu bơngai tôch hơbĕch hơbal mưh bơ̆ jang. Tơ̆ hnam pơgang rim năr mŏ pơtho ăn bơngai jang bơ̆jang mă ‘lơ̆ng rim tơdrong. Lơ̆m dôm tơdrong jang mŏ vang jang kŭm hăm đe ‘nhŏng oh jur tơ̆ pơlei roi tơbăt trong vei lăng đơ̆ng rŏng kơ rơnĕh, đang kơ ‘nŏh ƀet bơ̆ng jĭ tơ̆ ‘ngoăih hnam pơgang mă jang tôch tơnăp. Mŏ hơnơ̆ng tơgŭm ăn ‘nhŏng oh lơ̆m hnam pơgang”.

Oei ƀak si Nguyễn Thành Thảo, Phŏ Kơdră vei lăng Hnam pơgang apŭng Tu Mơ Rông ‘nŏh akhan: “Duch Y Hà jang tôch tơnăp lơ̆m tơdrong vei lăng jơhngâm pran ăn kon pơlei tơ̆ tơring. Hăm đon tơnăp ‘nŏh Y Hà hơnơng pơngơ̆t truh tơ̆ kon pơlei lơ̆m tơring păng Y Hà đei đon adrin tôch dêh mưh bơ̆ jang, hŏk iŏk tơdrong rơgei ‘nao. Duch Y Hà jĭ 1 ‘nu bơngai jang rơgei, tôch tơnăp tơ̆ hnam pơgang”.

Đei 26 sơnăm bơ̆jang, đĭ jơhngâm hăm tơdrong vei lăng jơhngâm pran ăn kon pơlei, mŏ Y Hà, Kơdră vei lăng Hnam pơgang xăh Tu Mơ Rông, apŭng Tu Mơ Rông, dêh char Kon Tum jĭ bơngai đei kon pơlei Xơ Đăng tơ̆ âu hơnơ̆ng gơnang yoa. Tơdrong plang jơhngâm, bơ̆jang tôch tơnăp păng tôch ‘mêm kơ tơdrong jang đơ̆ng mŏ hơnơ̆ng tơgop pơm tơplih đon tơchĕng, tơgŭm ăn kon pơlei tơ̆ tơring teh oei tôch pơmat tat âu đei khăm hơmet păng vei lăng jơhngâm pran roi ‘lơ̆ng ƀiơ̆. Kiơ̆ đơ̆ng noh, sư tơƀôh ăn bơ̆n tơdrong plang jơhngâm, bơ̆ jang tôch tơnăp đơ̆ng đe kăn ƀô̆, bơngai jang pơgang tơ̆ tơring hơtăih yăih. Atŭm hăm ‘nŏh tơƀôh hơdăh tơdrong mât 1 ƀơ̆r đon đơ̆ng khul kăn ƀô̆ jang pơgang păng kon pơlei tơ̆ tơring. Bơ̆n kŭm ƀôh jơhngâm hưch hanh đơ̆ng kon pơlei Xơ Đăng tơ tơring mưh đei kăn ƀô̆ jang pơgang gơ̆h hơgei nhen mŏ Y Hà, vang tơgop, pơm tơplih đon tơchĕng, pơih đei tơdrong ‘lơ̆ng mưh năm khăm, hơmet jĭ đơ̆ng kon pơlei.