‘Nâu jĭ ‘măng mă 3 hơnơ̆ng hloi Kơdră vei lăng kon pơlei dêh char Đắk Nông pơma nuh hăm kon pơlei jang chŭn mir. Hlŏh 130 nơ̆r apinh đei gơih ăn hop akŏm. Dôm tơdrong pơmat tat, tơhlăk tăk lơ̆m tơdỏng choh jang xa, kon pơlei jang chŭn mir, tơring tơrang; trong ƀao hiêm hăm tơdrong choh jang xa; choh jang ‘moi kiơ̆ tŏ ‘mi kial tơplih; dôm nơ̆r tơgop, tơƀôh trong hơmet ming anih choh jang xa đei gơih ăn Kơdră vei lăng kon pơlei dêh char Đắk Nông. 

Kiơ̆ đơ̆ng dôm nơ̆r tơgop đơ̆ng kon pơlei jang chŭn mir, HTX, ƀok Hồ Văn Mười, Kơdră vei lăng kon pơlei dêh char Đắk Nông pơtho ăn dôm anih jang kơpal, tơring tơrang akŏm jơhngâm hơmet pơ ‘lơ̆ng dôm tơdrong pơmat tat, tơhlăk tăk vă kon pơlei sơđơ̆ng jơhngâm choh jang xa. Ƀok Hồ Văn Mười oei pơlung kon pơlei adrin hlŏh dơ̆ng lơ̆m tơdrong choh jang xa, mă loi jĭ pơjing lơ trong jang hơdoi, dôm grŭp jang hơdoi, HTX vă akŏm jên tơmam, pơm hơtŏk mŭk drăm đơ̆ng choh jang xa tơ̆ tơring.