Pơgê năr 4 Têt Ất Tỵ, tơ̆ mir pơtăm ƀum ngô (ƀum iĕ) tơ̆ xah Đăk N’Drót, apŭng Đăk Mil, dêh char Đăk Nông, tơdrong pơtơm jang hăt hot. Jê̆ 30 bơngai jang tŏk bŏk oei rô̆ ƀum hăm nơ̆r hơhiĕk pơma dơnuh atŭm hăm jơva re đơ̆ng kơmăi kơmŏk. 'Nhŏng Y Đắp Kbuôr, tơ̆ pơlei Trắp B, xah Cư Mgar, apŭng Cư Mgar, dêh char Đăk Lăk tơroi, 'nhŏng năm đơ̆ng pơgê hrôih vă dah tom rô̆ ƀum tơ̆ âu.

Ƀok Lại Cao Điền, tơ-'ngla mir ƀum ăn tơbăt, 7ha ƀum ngô Nhâ̆t hlôi đei bơngai răt pơkăp kơjă 2 pah, khei năr pơjao ƀum. Kơlih hlôi pơkăp hơdrol noh trŏ ah năr 4 têt, kơsô̆ bơngai rô̆ ƀum đơ̆ng Đăk Lăk hlôi akŏm gre vă năm rô̆ ƀum tơtom, vei sơđơ̆ng khei năr pơdŭ ƀum ăn bơngai răt.

‘Năr 4 têt kŭm jing jơnăr kon pơlei tơ̆ dôm dêh char Tây Nguyên năm tơruih đak ăn cheh phe, sầu riêng păng lơ kơloăi ‘long pơtăm nai. Ƀok Y Danh Niê, tơ̆ plei Knia 3, xăh Ea Bar, apŭng Buôn Đôn, dêh char Đắk Lắk oei tăh hơmet ƀek đing vă pruih ăn chĕh phe. Ƀok Y Danh ăn tơbăt đĭ tơruih đơt mônh adrol ‘năr 20/12 âm bơih.

Dang ei xa têt đang pơkao chĕh phe đĭ jô bơih, trŏ hloi năr pruih ‘măng mă 2 hai. Pruih đang đak ăn chĕh phe ‘nŏh unh hnam vă yoă ƀa păng ƀât hơtuch khei 1 âm ‘nŏh phĕ tiu.