Kiơ̆ tơroi, sơnăm 2024 đei hloh 20.500 kơtơ̆ng ang, ƀai chih đơ̆ng dôm anih jang ƀăo chĭ chih tơroi gah dêh char Kon Tum. Atŭm hăm tơroi tôm tơdrong đei, ƀăo chĭ adoi ƀôh băt, tơbang dôm tơdrong oei tơjruh, tơnap tap tơ̆ minh ƀar tơring, anih jang lơ̆m dêh char. 'Nâu jĭ minh anih tơroi tơbăt kăp gĭt tơgŭm ăn tơdrong pơgơ̆r jang kơ dêh char Kon Tum roi năr roi tơnăp kăp gĭt hloh. Iung pơma ah hop akŏm, ƀok U Huấn, Phŏ Ƀĭ thư Tĭnh uy Kon Tum hơpơi 'meh: Sơnăm 2025, ƀăo chĭ athei jang sơnong kăp gĭt lơ̆m tơdrong tơroi tơbăt gah tơdrong pơgơ̆r, vei lăng, pơgơ̆r jang đơ̆ng dôm jăl jang, dôm anih jang, Hop akŏm Đảng ƀô̆ dôm jăl jang đơ̆ng 2025-2030, hơlêm tôm Đảng, tôm kon pơlei, tôm khul linh atŭm jơhngơ̆m, drơ̆ng minh khŏm mă jang đei jơnei tơdrong tơchơ̆t bot 'lơ̆ng jơnŭm pơgơ̆r kơ anih jang chĭnh trĭ.

Ƀơ̆t 'măng âu, Jơnŭm pơgơ̆r Pơlong Búa Liềm vàng Tĭnh uy Kon Tum pơjao 35 tơmam hơpah, lơ̆m noh đei 8 hơpah B; 12 hơpah C păng 15 hơpah pơchhơp jơhngơ̆m ăn bơngai chih, grŭp chih kơtơ̆ng ang đei iŏk jơnei Hơpah ƀăo chĭ pơ-'lơ̆ng Đảng kơ Đảng ƀô̆ dêh char Kon Tum 'măng mă 4 sơnăm 2024.