Đơ̆ng rŏng kơ noh, Kuôk hô̆i pơtôch 'măng hop akŏm ưh đei pơkăp mă 9. Minh ƀar tơchơ̆t đei Kuôk hô̆i drơ̆ng nơ̆r hơlen ah pơgê năr 19/2 đei: Tơchơ̆t đơ̆ng Kuôk hô̆i gah tơchơ̆t asong ming man jăl trong gre treng Lào Cai - Hà Nội - Hải Phòng; Tơchơ̆t gah minh ƀar tơdrong jang kăl vă hơtŏk pơm trong gre treng tơ̆ tơring kơdrơ̆m tơ̆ pơlei tơm Hà Nội, pơlei tơm Hồ Chí Minh; Tơchơ̆t gah asong ming man anih pơm tơlĕch unh hơyuh hat nhơ̆n Ninh Thuận; Luơ̆t Tơbang hla bar pơkăp khôi luơ̆t (hơmet ming); Luơ̆t Pơgơ̆r jang kơ jơnŭm pơgơ̆r tơring (hơmet ming); Tơchơ̆t gah sek tơlang minh ƀar tơdrong đei tơrĕk truh pơkăp bot 'lơ̆ng jơnŭm pơgơ̆r jang kơ teh đak; Tơchơ̆t hơmet jang ăn hơtŏk mŭk drăm – tơpôl sơnăm 2025 hăm tơchơ̆t hơtŏk đei 8% tŏk tơ̆ kơpal; Tơchơ̆t hơdah gah minh ƀar pơkăp jang vă pơklaih tơhlăk tơhlĭn lơ̆m pơm jang khua hŏk, kŏng ngê̆ păng tơplih 'nao gơh hơgei.

Adrol kơ ‘nŏh, năr (18/2), Kuôk hô̆i pơma nuh, drơ̆ng nơ̆r ăn Tơdrong tơchơ̆t đơ̆ng Kuôk hô̆i găh tơdrong pơgơ̆r Khul kơdră teh đak, Tơdrong tơchơ̆t đơ̆ng Kuôk hô̆i găn kơsô̆ bơngai jang lơ̆m Khul kơdră teh đak lơ̆m jăl jang kơ Kuôk hô̆i jăl XV (đei hơmet ming). Kiơ̆ kơ ‘nŏh, anih jang kơ Khul kơdră  teh đak đei 14 Anih tơm păng 3 anih jang hơtŏ hăm  anih tơm. Găh kơsô̆ bơngai jang lơ̆m Khul kơdră teh đak đei 25 ‘nu, đei Thủ tướng teh đak; 7 ‘nu Phó Thủ tướng; 14 ‘nu Ƀok Kơdră anih tơm păng 3 ‘nu Kơdră chĕp kơ̆l anih jang hơtŏ hăm anih tơm. Kuôk hô̆i oei kĭ pôk hơtŏk ƀok Mai Văn Chính păng ƀok Nguyễn Chí Dũng pơm Phó Thủ tướng teh đak, 4 ‘nu Kơdră tơm đei pôk hơtŏk ‘măng mă âu đei: Kơdră tơm vei lăng ming man Trần Hồng Minh, Kơdră tơm vei lăng Khoa hŏk panwg kơmăy kơmŏk Nguyễn Mạnh Hùng, Kơdră  tơm vei lăng choh jang xa păng cham char Đỗ Đức Duy, Kơdră tơm vei lăng Hơdrĕch kon kông păng tơdrong lui khop Đào Ngọc Dung.