Ƀar jăl trong ming man ou hơtaih 200km, đơ̆ng rŏng keh đang gô pơtoi tơƀưh pơlei tơm Đà Lạt (dêh char Lâm Đồng) hăm pơlei tơm Hồ Chí Minh păng dôm dêh char Đông Nam Bộ. Dang ei pơđĭ 2 tơdrong ming man ou oei ƀơm tơhlăk tơhlĭn nhen jên asong jang lơ pơm ăn tơdrong iŏk tơvih jên asong jang đunh khei năr (hloh 20 sơnăm), noh pơm ăn dôm anih iŏk ming man păng anih mong jên asong tŏk iŏk ưh gan lăp pơm jang, mă kăl noh hăm dôm tơdrong jang teh đak păng tơ-'ngla jang hadoi.

Phŏ Kơdră Anih jang vei lăng tơdrong ming man trong nơnăm dêh char Lâm Đồng Võ Ngọc Phát ăn tơbăt, dang ei anih jang păng dôm anih jang đei tơrĕk dih băl tŏk bŏk oei chă trong pơklaih, tơlĕch dôm trong jang vă dah hrôih keh đang hla bar kăl vă dôm jăl trong tih ou pơtơm đei ming man hơdrol kơ năr 30/4 ou kơnh.